Վրաստանի Գուդաուրի լեռնադահուկային կուրորտում ճոպանուղու վթարի հետեւանքով ութ տուժածները գտնվում են հիվանդանոցում, նրանցից մեկը հղի կին է։ Այս մասին հայտնել է Վրաստանի Առողջապահության, աշխատանքի ու սոցիալական պաշտպանության նախարարությունը։
Նախարարության տվյալներով վնասվածքներ ստացած հղի կինը Շվեդիայի քաղաքացի է, նրա վիճակը բժիշկները գնահատում են որպես կայուն։ «Նա եւս 24 ժամ կմնա բժիշկների հսկողության տակ»,- ասվում է հաղորդագրության մեջ։
Եւս երեք տուժածներ հիվանդանոցից դուրս կգրվեն օրվա ընթացքում, մեկ տուժած վիրահատվել է։ Կուրորտի այցելուներից մի քանիսին, որոնք տուժել էին վթարի հետեւանքով, հիվանդանոց են տեղափոխել ուղղաթիռներով։
«Իմեդի» վրացական հեռուստաալիքի տվյալներով, վթարի հետեւանքով ընդամենը տուժել է 11 մարդ, այդ թվում զբոսաշրջիկներ Ռուսաստանից, Ուկրաինայից ու Շվեդիայից։
Նախնական տվյալներով անջատվել էր ճոպանուղու էլեկտրամատակարարումը ու արգելակման համակարգում խափանում էր տեղի ունեցել, ինչի հետեւանքով լեռան գագաթ բարձրացած նստատեղերը սկսել են շարժվել հետադարձ ուղղությամբ՝ ընդ որում այնպիսի արագությամբ, որ ուղեւորներից մի քանիսը ընկել են։
Այս փաստով Վրաստանի ՆԳՆ-ն քրեական գործ է հարուցել ։
Վթար՝ Գուդաուրիի ճոպանուղում. տուժել է ավելի քան տասնյակ մարդ https://news.am/arm/news/441378.html