Հայաստանում ԱՄՆ դեսպանատունը մեկնաբանել է մի քանի լրատվամիջոցների կողմից տպագրված «Կենտրոնական հետախուզական վարչության գործակալների» եւ նրանց կողմից հավաքագրված անձանց մասին հրապարակումները։
NEWS.am-ի թղթակցի հարցման ի պատասխան՝ ԱՄՆ դիվանագիտական ներկայացուցչությունից նշել են․ «Սույն հոդվածով առաջ քաշված նկատառումներն արհեստածին են և չունեն ոչ մի աղերս իրականության հետ ։ Ցավալի է, որ ոմանք անհիմն հայտարարությունների միջոցով փորձում են թշնամանք և վախ սերմանել՝ ջանալով վնաս հասցնել հետզհետե ամրապնդվող մեր երկկողմ կապերին։»։
Նշենք, որ «ԿՀՎ կողմից հավաքագրված գործակալների» մասին հրապարակումները համացանցում հայտնվել են վերջերս, իսկ նախօրեին խանդավառությամբ տարածվել նաեւ ադրբեջանական մամուլում:
Անհայտ ծագման ցուցակում նշվում են, իբրեւ թե, դեսպանատան աշխատակիցների, հայկական պաշտոնյաների, լրատվամիջոցների եւ հասարակական կազմակերպությունների անուններ։