Մարտի 16-ին տեղի է ունեցել Վիետնամում ՀՀ դեսպան Ռաիսա Վարդանյանի հանդիպումը Հայաստան-Վիետնամ Բարեկամության Ասոցիացիայի անդամների եւ Վիետնամի գործարար շրջանակների ներկայացուցիչների հետ:
ԱԳՆ-ից NEWS.am-ին հայտնում են, որ հանդիպմանը քննարկվել է հայ-վիետնամական հարաբերությունների օրակարգի խթանմանն առնչվող հարցերի լայն շրջանակ: Անդրադարձ է կատարվել հումանիտար, առեւտրատնտեսական, ներդրումների եւ, հատկապես, զբոսաշրջային ոլորտում իրականացվող ծրագրերին եւ տվյալ ուղղություններով երկկողմ համագործակցության խթանման նպատակով ձեռնարկվելիք քայլերին:
Մտքեր են փոխանակվել տարածաշրջանային մի շարք զարգացումների շուրջ: Այդ համատեքստում ներկաների խնդրանքով դեսպան Վարդանյանը ներկայացրել է Հայաստանում խորհրդարանական կառավարման համակարգին անցնելու գործընթացը, ղարաբաղյան հիմնախնդրի խաղաղ կարգավորման ուղղությամբ Հայաստանի եւ ԵԱՀԿ Մինսկի խմբի համանախագահ երկրների կողմից գործադրվող ջանքերը, ինչպես նաեւ Հայաստանի դիրքորոշումները տարածաշրջանային հիմնախնդիրների եւ դրանց հանգուցալուծման ուղղությամբ:
