Լեհաստանի Սենատի Միջազգային հարաբերությունների եւ Եվրամիության հետ կապերի կոմիտեի պատվիրակությունը, որը գլխավորում է Մարեկ Ռոդսկին, այցելել է «Ծիծեռնակաբերդի» հուշահամալիր եւ անմար կրակի մոտ ծաղիկներ դրել, փոխանցում է NEWS.am-ի թղթակիցը:
Պատվիրակությանն ուղեկցել են Հայաստանում Լեհաստանի արտակարգ եւ լիազոր դեսպան Պավել Չեպլակը եւ հայ-լեհական բարեկամության խորհրդարանական խմբի անդամ, պատգամավոր Շիրակ Թորոսյանը:
Լեհական պատվիրակությունն այցելեց նաեւ Հայոց ցեղասպանության ինստիտուտ-թանգարան: Պատվիրակության անդամները ծանոթացան ցուցադրանմուշներին, որից հետո Մարեկ Ռոդսկին գրառում կատարեց Հուշամատյանում:
«Ես, մասնավորապես, գրեցի, որ տեղի ունեցածը չի կարող որեւէ մեկին անտարբեր թողնել: Եվ, հաշվի առնելով, թե մեր 2 ժողովուրդների՝ հայերի ու լեհերի պատմությունները որքան նման են, ինչի միջով են նրանք ստիպված եղել անցնել, մենք պետք է մտածենք այն մասին, թե մեր ապագան ինչպես կառուցենք»,- լրագրողների հետ զրույցում ասաց Մարեկ Ռոդսկին:
Նրա խոսքով՝ հայկական եւ լեհական կողմերը պետք է ամեն ինչ անեն, որպեսզի աճող սերունդը, ունենալով ընդհանուր հիմք եւ 2 երկրների պատմության մասին գիտելիքներ, կարողանա հնարավոր ամեն ինչ անել՝ հակասական եւ բարդ հարցերը լուծելու համար:
