Մարտի 6-ին, ժամը 20.15-ին, հիվանդանոցից ոստիկանության Արաբկիրի բաժնում հաղորդում էր ստացվել, որ «վերին շրթունքի շրջանի կտրած-ծակած վերք» ախտորոշմամբ բուժօգնության է դիմել 69-ամյա Համլետ Ս.-ն եւ հայտնել, որ նույն օրը, ժամը 18.00-ին, Ազատության պողոտայի թիվ 19 հասցեի մոտ, երկու անհայտ անձանցից մեկը բռունցքով հարվածել է իր դեմքին, տաբատի գրպանից բացահայտ հափշտակել 2.600 դոլար եւ դիմել փախուստի:

Ոստիկանության մամուլի ծառայությունից NEWS.am-ին հայտնում են, որ ոստիկանության Երեւան քաղաքի վարչության եւ Աաբկիրի բաժնի ծառայողները, կողոպուտ կատարելու կասկածանքով, մարտի 19-ին, ժամը 20.40-ին, Գրիբոյեդովի փողոցի թիվ 7 շենքի մոտից բերման են ենթարկել 1984 թ. ծնված Վարդան Մ.-ին, Մանթաշյան փողոցի թիվ 2 շենքի մոտից՝ 1982 թ. ծնված Սարգիս Մ.-ին, Մամիկոնյանց փողոցի թիվ 36 շենքի մոտից՝ 1981 թ. ծնված Էդգար Ա.-ին:

Նրանք ձերբակալված են:

Կատարվում է նախաքննություն: