Հայաստանում հասարակական ընդվզումը քիչ հավանական է։ Այս մասին մարտի 24-ին՝ լրագորղների հետ հանդիպման ժամանակ նշել է քաղաքագետ Ալեքսանդր Մանասյանը։
Միաժամանակ, նրա կարծիքով, քաղաքացիական ընդվզումը կարեւոր է, քանի որ քաղաքացիական հասարակությունը պետք է պայքարի իր իրավունքների համար։
«Բայց պայքարը տարբեր կերպ կարող է լինել։ Ենթադրենք, պայքար մի պետության մեջ, որը կայունացման կարիք ունի, այդ պարագայում պայքարը ցանկալի չէ, ես դա ընդհանուր եմ ասում: Այսպիսի խոսք կա` գետանցի ժամանակ ձիերը չեն փոխում»,-պարզաբանել է Մանասյանը։
Քաղաքագետի համոզմամբ՝ ցանկացած իրադարձություն կարելի է ներկայացնել որպես գետանց, քանի որ հասարակությունը մշտապես զարգանում է, պարբերաբար միջազգային հարթակում իրավիճակը փոխվում է եւ առաջին պլան են դուրս գալիս նոր սպառնալիքներ։
Քաղաքագետի փոխանցմամբ՝ այստեղ քաղաքական իշխանության խնդիրը հետեւյալն է, թե արդյոք քաղաքական վերնախավը պատրաստ է կադրային լուրջ փոփոխություններ կատարելու անցումն ապահովելու համար, թե ոչ։ «Վերնախավը պետք է որոշի, դա նրանց պատասխանատվության խնդիրն է, ընդունել այս կամ այն որոշումը»,-նշել է փորձագետը։