Հայաստանը կայուն զարգացման մեծ ներուժ ունի, եւ իրականացվող քայլերն ուղղված են դրա լիարժեք իրացմանը: Հայաստանում ՄԱԿ-ի նորանշանակ մշտական համակարգող, Զարգացման ծրագրի (ՄԱԶԾ) մշտական ներկայացուցիչ Շոմբի Շարփի հետ այսօր՝ մարտի 28-ի հանդիպմանը ներկայացնելով տարբեր ոլորտներում կառավարության նախաձեռնած բարեփոխումները՝ ասել է ՀՀ վարչապետ Կարեն Կարապետյանը:
Վարչապետը շնորհավորել է Շոմբի Շարփին՝ պաշտոնը ստանձնելու կապակցությամբ եւ վստահություն հայտնել, որ ՄԱԿ-ի պաշտոնյան իր ներդրումը կունենա երկկողմ համագործակցությունն առավել զարգացման գործում: Կարեն Կարապետյանը նշել է, որ ՄԱԿ-ի հայաստանյան գրասենյակի հետ սերտ փոխգործակցություն է ձեւավորվել, արդյունավետ մի շարք ծրագրեր են իրականացվել, միեւնույն ժամանակ համատեղ աշխատանքի նոր հեռանկարային ուղղություններ կան:
Շոմբի Շարփը նշել է, որ պատվով է ստանձնում Հայաստանում ՄԱԿ-ի մշտական համակարգողի պաշտոնը եւ իր առաքելության ընթացքում կներդնի առավելագույն ջանքեր՝ Հայաստանի զարգացմանը միտված ծրագրերում ՄԱԿ-ի ներգրավվածությունն ապահովելու եւ դրանք հաջողելու համար: Նա ողջունել է Հայաստանի կառավարության կողմից բարեփոխումների նախաձեռնումը, ինչպես նաեւ տնտեսական աճի եւ մակրոտնտեսական բարձր ցուցանիշների արձանագրումը՝ ընդգծելով, որ ՄԱԿ-ն այսուհետ եւս պատրաստ է աջակցել Հայաստանում շարունակական ռեֆորմների եւ ներդրումային ծրագրերի իրականացմանը:
Զրուցակիցները մտքեր են փոխանակել Հայաստան-ՄԱԶԾ համագործակցության զարգացման հեռանկարների վերաբերյալ: Այս համատեքստում անդրադարձ է եղել Հայաստան-2030 զարգացման օրակարգին, կարեւորվել է դրա իրականացման գործում սերտ համագործակցությունը:
