Մի շարք ամերիկացի վարորդներ դատարան կոլեկտիվ հայց են ներկայացրել BMW-ի BMW of North America ստորաբաժանման դեմ՝ մեղադրելով ավտոմեքենաների մեջ ծրագրային ապահովման տեղադրման մեջ, որը նվազեցնում է վնասակար արտանետումների ցուցանիշները, հայտնում է BMWBLOG ամսագիրը:

Պարբերականը նշում է, որ կոնցեռնի հյուսիսամերիկյան ստորաբաժանման դեմ հայցը ներկայացվել է Նյու Ջերսիի դատարան: Հայցվորների տեղեկացմամբ՝ BMW-ն 2009-2011 թվականներին արտադրված BMW X5 եւ BMW 335d ավտոմեքենաների մեջ տեղադրել է հատուկ ծրագրեր, որոնք արտանետումների տվյալները նվազեցնում են:

«Մեզ համար սկզբունքորեն կարեւոր է, որպեսզի BMW Group-ի ավտոմեքենաներում ոչ մի մանիպուլյացիա չլինի, եւ որպեսզի դրանք համապատասխանեն օրենսդրության բոլոր համապատասխան պահանջներին»,- իր հերթին նշել է BMW North America-ի ներկայացուցիչ Քեն Սփարքսը պարբերականին ուղարկած գրավոր մեկնաբանության մեջ:

Անցյալ շաբաթ լրատվամիջոցները հայտնել էին, որ BMW-ի Մյունխենի կենտրոնակայանում եւ Ավստրիայի Շթայրեի գրասենյակում խուզարկություններ են կատարվել՝ կապված արտանետվող գազերի մանիպուլյացիաներին վերաբերող սկանդալի քննության հետ: Ընկերությանը կասկածում են թեստային փորձարկումների ցուցանիշները մանիպուլացնող սարք օգտագործելու մեջ:

Մյունխենում փետրվարի վերջին նախաքննություն էր սկսվել կոնցեռնի ավտոմեքենաների արտանետումների մանիպուլացման վերաբերյալ, խոսքը վերաբերում է 11 հազար 400 դեպքի: Դատախազության տվյալներով՝ նախկինում կոնցեռնն ընդունել էր 750xd եւ M550xd մոդելներում անթույլատրելի մանիպուլյացիաների առկայությունը: Սակայն BMW-ի ներկայացուցիչների հայտարարության համաձայն՝ խոսքը պատահականության մասին էր: