Ադրբեջանցի փախստականները կարող են վերադառնալ Արցախ, եթե նրանք ճանաչեն նրա իրավազորությունը: Այս մասին Mirror Spectator-ին տված հարցազրույցում հայտարարել է Արցախի նախագահ Բակո Սահակյանը:
Նա բարձր է գնահատել ղարաբաղյան կարգավորման հարցում ԵԱՀԿ Մինսկի խմբի դիվանագիտական ջանքերը: «Մենք հասկանում ենք, որ միջազգային հանրությունը՝ ի դեմս Մինսկի խմբի անհանգստացած է այդ բարդ հարցի լուծմամբ: Սակայն Մինսկի խմբի շահագրգռվածությունը բավարար չէ: Մեր խորին համոզմամբ` Ադրբեջանի ոչ կառուցողական, ծայրահեղական, ռազմատենչ դիրքորոշումը խոչընդոտ է, որը մենք չենք կարող հաղթահարել ավելի լուրջ պայմանավորվածությունների ձեռքբերման համար», - ասել է Սահակյանը:
Նրա խոսքով՝ կարգավորման հաջող գործընթացի համար անհրաժեշտ է, որ Արցախը բանակցությունների լիիրավ կողմ դառնա, ինչպես 1994 թվականին Բուդապեշտում կայացած ԵԱՀԿ գագաթաժողովում ի սկզբանե որոշվել էր: Նա նշել է, որ Արցախը շարունակում է անել ամեն ինչ, որպեսզի վերականգնի այս ձեւաչափը:
Խոսելով փախստականների մասին՝ Սահակյանը նշել է, որ ներկայումս հիմնականում խոսում են ադրբեջանցի փախստականների մասին: «Մենք, բնականաբար, կողմ ենք արտահայտվում, որ խոսեն ոչ միան ադրբեջանցի փախստականների, այլեւ հայ փախստականների մասին: Մենք բազմիցս ասել ենք, որ ադրբեջանցի փախստականները, բնականաբար, կարող են վերադառնալ Արցախ, եթե ճանաչեն նրա իրավազորությունը », - ասել է նա:
