Ֆրանսիան, Մեծ Բրիտանիան եւ Գերմանիան փորձում են համոզել իրենց եվրոպական գործընկերներին աջակցել Իրանի դեմ նոր պատժամիջոցներին՝ իրանական միջուկային գործարքի պահպանման համար, հաղորդում է Reuters-ը:
Բրյուսելում Եվրամիության դեսպանների փակ նիստին Լոնդոնը, Փարիզը եւ Բեռլինը խնդրել են ԵՄ-ին սատարել ապրիլին նոր պատժամիջոցների պաշտոնական հավանությանը: Սակայն Իտալիան Իսպանիայի եւ Ավստրիայի աջակցությամբ ընդդիմանում է նոր պատժամիջոցներ մտցնելու ծրագրերին: Հռոմը գտնում է, որ այդ պատժամիջոցները բավարար չեն լինելու, որպեսզի համոզել Միացյալ Նահանգների նախագահ Դոնալդ Թրամփին դուրս չգալ Իրանի միջուկային համաձայնագրից, եւ վտանգի կենթարկեն Իրանի հետ զարգացող գործնական կապերը:
ԵՄ կանոնակարգերի համաձայն՝ տնտեսական պատժամիջոցները միաձայն աջակցություն են պահանջում: «Իտալիան հայտարարել է, որ երկխոսությունը նախընտրելի տարբերակ է եւ որ, առանց ԱՄՆ-ին համոզելու, պատժամիջոցները կարող են թուլացնել մեր դիրքորոշումը», - ասել է դիվանագետը: «Իսպանիան խնդրել է քննարկել նման քայլի հետեւանքները»:
