Մեծ Բրիտանիայի պաշտպանության նախարար Գեվին Ուիլյամսոնը կոչ է արել Ռուսաստանի կողմից աճող սպառնալիքի պայմաններում զարգացնել երկրի պաշտպանական համալիրը: Երկրի նախարարն այս մասին գրել է Telegraph-ում հրապարակված հոդվածում, փոխանցում է «Կոմերսանտ»-ը:
Պարոն Ուիլյամսոնի խոսքով՝ աշխարհը «պատերազմի նոր վտանգավոր դարաշրջան է մուտք գործել» : «Մեծ Բրիտանիայի պաշտպանության համար կենսականորեն կարեւոր է շարունակել զարգացումը՝ արդեն վաղվա այդ սպառնալիքներին դիմակայելու, մեր երկրի անվտանգությունն ապահովելու եւ դժվարությամբ ձեռքբերված ազատություննների եւ ներկայիս կենսաձեւի պաշտպանության համար»,- նշել է նախարարը:
«Պուտինն օգտագործում է աճող հիբրիդային հնարավորությունները կործանման, վիժեցման եւ աշխարհի երկրների վրա ազդեցություն գործելու նպատակով», - ասել է բրիտանացի նախարարը: Ուիլյամսոնը նշել է, որ համաշխարհային հանրության համբերությունը Ռուսաստանի նախագահի նկատմամբ «սպառվում է»: Խոսելով Մոսկվայի կողմից վտանգի մասին՝ նա հիշեցրել է բրիտանական Սոլսբերիում Գլխավոր հետախուզական վարչության նախկին գնդապետ Սերգեյ Սկրիպալի թունավորման մասին: Նախարարն այն «հրեշավոր հանցագործություն է» անվանել:
