Ռուսաստանի, Թուրքիայի եւ Իրանի նախագահները Սիրիայի վերաբերյալ հայտարարություն են ստորագրել, որում համաձայնել են շարունակել համագործակցությունը Սիրիայում խաղաղության հասնելու համար, հաղորդում է ռուսական «Առաջին ալիք»-ը:
Հայտարարությունը ստորագրվել էր Անկարայում նախագահներ Վլադիմիր Պուտինի, Հասան Ռոհանիի եւ Ռեջեփ Էրդողանի հանդիպման արդյունքներով:
Հայտարարության մեջ նշվում է, որ Ռուսաստանը, Իրանն ու Թուրքիան աջակցում են Սիրիայի ինքնիշխանությանը, միասնությանը եւ տարածքային ամբողջականությանը եւ պատրաստ են շարունակել պայքարը ահաբեկչության դեմ: Երեք երկրների ղեկավարները ընդգծել են ահաբեկիչներին զինված ընդդիմությունից բաժանելու կարեւորությունը:
Մոսկվան, Թեհրանն ու Անկարան կոչ են արել Միավորված ազգերի կազմակերպությանը եւ ողջ միջազգային հանրությանը լրացուցիչ մարդասիրական օգնություն տրամադրել Սիրիայի Արաբական Հանրապետությանը:
Կողմերը նաեւ հայտարարել են, որ շարունակելու են համագործակցությունը՝ «ԻՊ»-ի եւ «Ալ-Քաիդա»-ի լիակատար վերացման համար: Բացի այդ, «ՏԱՍՍ»-ի հաղորդմամբ, Ռուսաստանի, Իրանի եւ Թուրքիայի նախագահները ընդգծել են իրենց կողմնակցությունը Սիրիայի անկախությանն եւ միասնությանը:
Համատեղ հայտարարության մեջ նշվում է, որ Ռուսաստանի, Իրանի եւ Թուրքիայի ղեկավարների հերթական հանդիպումը սիրիական կարգավորման վերաբերյալ տեղի կունենա Իրանում, գրում է «Իզվեստիա»-ն: