Վիտալինա Ցիմբալյուկ-Ռոմանովսկայան հայտարարել է, որ ինչ-որ խաբեբաներ խլել են իր բնակարանը: Սակայն Արմեն Ջիգարխանյանի ընկերը հայտնել է, որ նա ինքն է վերադարձրել այն՝ վախենալով նոր քրեական գործից, հաղորդում է «Դնի.ռու»-ն:
Մինչեւ վերջերս Վիտալինա Ցիմբալյուկ-Ռոմանովսկայան երեք բնակարան է ուներ: Սակայն օրերս թոք-շոուի եթերից դաշնակահարուհին հայտարարել էր, որ չի կարողացել մտնել Մոլոդոգվարդեյսկայա փողոցի վրա գտնվող բնակարանը, որտեղ եւ նա ապրում էր, քանի որ դռան կողպեքները փոխված էին:
Վիտալինայի փաստաբան Լարիսա Շիրոկովան դիմել էր գրանցման պալատին եւ պարզել, որ այս մեկ սենյականոց բնակարանն այլեւս Ցիմբալյուկին չի պատկանում: Վիտալինան վստահ է, որ ինչ-որ խաբեբաների զոհ է դարձել եւ հայտարարել է դատախազություն դիմելու մտադրության մասին:
Սակայն, ինչպես պնդում է Արմեն Ջիգարխանյանի ընկեր Արթուր Սողոմոնյանը, իրականում հենց Վիտալինան է վերադարձրել բնակարանը նախկին ամուսնուն: Նրա խոսքով՝ Ջիգարխանյանը խնդրել էր վերադարձնել բնակարանը, երբ ամուսինների միջեւ սկանդալը նոր էր ծագել, սակայն կինը հայտարարել էր, որ բնակարանը վաղուց արդեն վաճառվել է: Սողոմոնյանը ստուգել էր Ռոմանովսկայայի խոսքերը, եւ պարզվել էր, որ դա այդպես չէ, ուստի դիմում էր ներկայացրել՝ այդ անշարժ գույքի հետ բոլոր գործարքները դադարեցնելու խնդրանքով:
Ըստ Սողոմոնյանի՝ այս բնակարանը հատուկ արժեք է ներկայացնում դերասանի համար: Ջիգարխանյանը բնակարանը գնել էր 2010 թվականին, սակայն մի քանի տարի անց Ցիմբալյուկ-Ռոմանովսկայան վերագրանցել էր այն իր անունով: