Սոլսբերիում տուժած ՌԴ քաղաքացի Յուլիա Սկրիպալի զարմուհին կարծում է, որ «բրիտանացիները թաքցնելու բան ունեն»: Այս մասին նա ասել է Sky News-ին այն բանից հետո, երբ Բրիտանիայի իշխանությունները հրաժարվել են նրան երկիր մեկնելու վիզա տրամադրել, հաղորդում է ՏԱՍՍ-ը:
Ավելի վաղ BBC-ն հաղորդել էր, որ բրիտանացիները հրաժարվել են վիզա տրամադրել Վիկտորիա Սկրիպալին, որը մտադիր էր այցելել Սոլսբերիում տուժած զարմուհուն:
Reuters-ի փոխանցմամբ՝ Միացյալ Թագավորության Ներքին գործերի նախարարության մամուլի քարտուղարը մերժումը բացատրել է նրանով, որ որպես հյուր մեկնելու համար վիզա տրամադրելը «չի համապատասխանում ներգաղթի կանոններին»:
Մարտի 4-ին 66-ամյա ԳՀՎ նախկին գնդապետ Սերգեյ Սկրիպալը, որը Ռուսաստանում դատապարտվել էր Բրիտանիայի օգտին լրտեսության համար, եւ նրա 33-ամյա դուստր Յուլիան, Սոլսբերիում, բրիտանական կողմի համաձայն, նյարդակաթվածային թույնով թունավորվել էին:
