Ինչպես հասկացա, պատգամավորները գիշերվա ընթացքում են եկել Ազգային ժողով: Այս մասին, այսօր՝ ապրիլի 17-ին, ԱԺ մուտք գործելիս նշեց «Ելք» խմբակցության պատգամավոր Էդմոն Մարուքյանը:
«Ես տեղեկություն ունեմ, որ բոլորն այստեղ են եւ նիստը կգումարվի: Պետք է անպայման դեմ քվեարկել, չի կարելի թույլ տալ, որ Սերժ Սարգսյանը ընտրվի ինչպես Հյուսիսային Կորեայում»,-ասաց նա:
Դիտարկմանը, որ գուցե ճիշտ կլինի ընդհանրապես չմասնակցել ԱԺ նիստին, մարուքյանն արձագանքեց, որ դա հենց ՀՀԿ-ի ու Սերժ Սարգսյանի ամենահարմար տարբերակն է, երբ տպավորություն է, որ ամեն ինչ լավ է. «Մենք եկել ենք, որ ամեն ինչ շատ լավ չլինի: Մեր ելույթները արդեն գործողություն են: Եթե նիստ է գումարվում ու մենք չենք մասնակցում, ապա Սերժ Սարգսյանին թույլ է տրվում ընտրվել առանց իրեն ուղղված որևէ խոսքի, իրեն ուղղված որևէ ասելիքի, որը բխում է ՀՀ քաղաքացիների սրտերից»,- ասաց նա:
Նա նշեց, որ չեն պատրաստվում միանալ Նիկոլ Փաշինյանին:
«Մենք ասել ենք, եթե բռնություն լինի կգանք կմիջամտենք, այդ որոշումն ուժի մեջ է: Ես ճիշտ էի, թե ճիշտ չէի, ժամանակը ցույց կտա, ես իմ գաղափարներում ամուր կանգնած եմ, ինչ ասել եմ ուժի մեջ է, որևէ բան, ինչ ասել եմ մինչև այս պահը չի փոխվել»,- ասաց նա:
