ՀՀ քաղաքացիներն ազատ են մասնակցել այն միջոցառումներին, որին հարկ են համարում մասնակցել: Այս մասին, այսօր՝ ապրիլի 18-ին, լրագրողների հետ զրույցում նշեց «Իմ քայլը» նախաձեռնության ղեկավար, «Քաղաքացիական պայմանագիր» կուսակցության առաջնորդ Նիկոլ Փաշինյանը՝ անդրադառնալով ԿԳՆ կոչին՝ զերծ մնալ զանգվածային միջոցառումներին դեռահասներին մասնակից դարձնելու փորձերից:
«Ես ուզում եմ ի պատասխան հիշեցնել, որ ՀՀԿ-ի եւ Սերժ Սարգսյանի նախընտրական հավաքներին երեխաներին զանգվածաբար, ստիպողաբար հանում էին դպրոցներից, փուչիկներով տանում էին հավաքների:
ԿԳՆ-ն ոչ մի բարոյական իրավունք չունի նման կոչով որեւէ մեկին դիմել, որովհետեւ նախ նման կոչով ինքն իրեն պետք է դիմի, որից հետո պետք է մտածել՝ ինքն իրավունք ունի՞ այսպիսի կոչով հանդես գալ: Ես դատապարտում եմ բոլոր այն դեպքերը, երբ մանկահասակ երեխաներին ներքաշում են ՀՀԿ-ի եւ Սերժ Սարգսյանի քարոզարշավի մեջ»,-հայտարարեց Փաշինյանը:
Ավելի վաղ ՀՀ կրթության եւ գիտության նախարարությունը հանդես էր եկել հայտարարությամբ, որտեղ հորդորում էր քաղաքական ուժերին, հասարակական նախաձեռնություններին եւ անհատներին զերծ մնալ զանգվածային միջոցառումներին դեռահասներին մասնակից դարձնելու փորձերից:
«Միաժամանակ, կոչ ենք անում ծնողներին, հաշվի առնելով դպրոցահասակների անվտանգության խնդիրը եւ տարիքային առանձնահատկություններին բնորոշ զգացմունքայնությունը, դրսեւորել հետեւողականություն եւ, համագործակցելով ուսումնական հաստատությունների հետ, բացառել սովորողների անուշադրության տիրույթում հայտնվելու հնարավորությունը»,-ասված է ԿԳՆ կոչում:
Զերծ մնալ զանգվածային միջոցառումներին դեռահասներին մասնակից դարձնելու փորձերից. ԿԳՆ կոչը