Ուրախ եմ, որ Հայաստանում վերջին օրերի գործընթացները տեղի են ունենում առանց լուրջ բռնությունների: Այս մասին NEWS.am-ի հետ զրույցում ասաց Կալիֆորնիա կուրիեր» թերթի հրատարակիչև խմբագիր Հարութ Սասունյանը` անդրադառնալով «Քաղաքացիական պայմանագիր» կուսակցության ղեկավար Նիկոլ Փաշինյանի «Քայլ արա, մերժիր Սերժին» նախաձեռնության բողոքի ակցիաներին:
«Ուրախ եմ, որ Հայաստանում այս գործընթացները տեղի են ունենում առանց բռնությունների, եւ հանրահավաքի ղեկավարները քաջալերում են ժողովրդին, որ որեւէ բռնություն եւ միջադեպեր տեղի չունենան ոստիկաննների հետ: Շատ քաջալերելի է, հուսամ այդպես կշարունակվի, բացի մի քանի մանր միջադեպերից: Երկրորդը ես ուրախ եմ, որ մեր երիտասարդությունը ակտիվացել է, եւ ուզում է որ իր հայրենիքը ավելի զարգացած տեսնի եւ փոփոխություններ լինի: Դա լավ է, քանի որ երկար ժամանակ տեսնում էի, որ մեր ժողովրդի մեջ մեծ թուլություն կար եւ հոգ չէին տանում, թե ինչ է տեղի ունենում երկրում, պարզապես դժգոհ էին, մեծ մասն էլ որպես դժգոհության հետեւանք արտագաղթել է: Հիմա որ տեսնում եմ` նոր սերունդը ավելի խանդավառ է իր կյանքով, իր շրջապատով, դա շատ դրական է, որովհետեւ նոր սերունդը մեր հայրենիքի ապագան է, եւ ուզում ենք, որ մեր նոր սերունդը մասնակից լինի բոլոր զարգացումներին, որ տեղի են ունենում մեր երկրում»,- ասաց նա:
Հարութ Սասունյանը նշեց, որ նախորդ տարիների բոլոր շարժումները հաջողություն չեն ունեցել. «Նաեւ պետք է հստակեցնենք, թե հաջողություն ասելով ինչ ի նկատի ուեննք, քանի որ ունենք 2 ծայրահեղ դիրքորոշումներ: Մեկն այն է, որ վարչապետ Սերժ Սարգսյանը պետք է հրաժարական տա, իսկ մյուսն այն իրականություն է, որ վարչապետը մեծամասնության ներկայացուցիչն է, եւ որեւէ պատճառ չունի հրաժարական տալ: Այ ս ամենը որեւէ լուծումի չի տանում, ես կարծում եմ, որ պետք է նստել բանակցության սեղանի շուրջ եւ տեսնել, թե ինչ լուծման կարող են հասնել համատեղ»:
Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցության առաջնորդ Նիկոլ Փաշինյանն իր աջակիցների հետ միասին ապրիլի 13-ից բողոքի ակցիաներ է իրականացնում Երեւանի փողոցներում՝ արգելափակելով փողոցներն ու հրապարակները: Նրանք բողոքում են Սերժ Սարգսյանի վարչապետ դառնալու դեմ: Բողոքի ակցիաների ընթացքում բախումներից տուժել է 46 մարդ, այդ թվում Նիկոլ Փաշինյանը: Մի քանի տասնյակ մարդիկ բերման են ենթարկվել, այդ թվում անչափահասներ: Միայն այսօր բերման է ենթարկվել շուրջ 100 մարդ:
Կա հարուցված քրեական գործ Հանրային ռադիո մուտք գործելու եւ Մաշտոց-Թումանյան խաչմերուկում միջադեպի փաստերով՝ ՀՀ քրեական օրենսգրքի 225-րդ հոդվածի հատկանիշներով:
Նշենք, որ ապրիլի 17-ին ԱԺ հատուկ նիստում Սերժ Սարգսյանը ՀՀ վարչապետ է ընտրվել 77 կողմ, 18 դեմ ձայներով:
