Իսրայելում Ռումինիայի դեսպանատունը Թել Ավիվից Երուսաղեմ տեղափոխությունը կնշանակեր միջազգային իրավունքի խախտում: ՏԱՍՍ-ի փոխանցմամբ՝ այս մասին նշված է ուրբաթ Ռումինիայի նախագահ Կլաուս Յոհանիսի աշխատակազմի կայքում հրապարակված հայտարարության մեջ:
Նախագահի աշխատակազմը հիշեցնում է, որ կան ՄԱԿ ԱԽ եւ ՄԱԿ ԳՎ մի շարք բանաձեւեր, որոնցում ի թիվս այլոց ՄԱԿ պետություններին առաջարկվում է զերծ մնալ Երուսաղեմում դիվանագիտական առաքելությունների տեղակայումից, իսկ միջազգային ջանքերն ինտենսիվացնել Մերձավոր Արեւելքում հաստատուն, համընդգրկուն եւ արդարացի խաղաղության հաստատման նպատակով: «Այսպիսով, այս փուլում Ռումինիայի դեսպանատան տեղափոխումը Երուսաղեմ կնշանակեր միջազգային իրավունքի խախտում»,- ընդգծում են նախագահի աշխատակազմից:
Ռումինիայի նախագահը հաստատում է, որ Երուսաղեմի կարգավիճակի վերաբերյալ երկրի դիրքորոշումը շարունակում է համապատասխանել ՄԱԿ ԱԽ եւ ՄԱԿ ԳՎ բանաձեւերի դիրքորոշմանը:
Նախագահի աշխատակազմից հավելել են, որ Երուսաղեմ Ռումինիայի դեսպանատան տեղափոխության մասին կառավարության հուշագիրը հիմնված չէ խորը եւ համակողմանի գնահատականի վրա:
Ռումինիայի կառավարության կողմից Իսրայելում Ռումինիայի դեսպանատունը Թել Ավիվից Երուսաղեմ տեղափոխելու մասին հուշագրի ընդունման մասին հինգշաբթի երեկոյան Antena 3 հեռուստաալիքի ծրագրում հայտնել է Ռումինիայի պատգամավորների պալատի (խորհրդարանի ստորին պալատ) նախագահ և իշխող Սոցիալ–դեմոկրատական կուսակցության առաջնորդ Լիվիու Դրագնյան:
Ռումնիայի կառավարության ապրիլի 18-ի նիստում ընդունված փաստաթղթերի ցանկում Իսրայելում Ռումինիայի դեսպանատունը Թել Ավիվից Երուսաղեմ տեղափոխելու մասին հուշագիրը նշված չէ: