Ստեղծված իրավիճակում հիմնական ելքը կարծում եմ` քաղաքական բանակցություններն ու կոնսուլտացիաներն են: Այս մասին այսօր՝ ապրիլի 26-ին, ԱԺ-ում լրագրողների հետ զրույցում ասել է ՀՀԿ խմբակցության պատգամավոր Խոսրով Հարությունյանը:
«Բանակցությունների արդյունքում կգանք ընդհանուր մոտեցումների` այսինքն ինչպիսի լուծումներ գտնենք, որպեսզի այս իրավիճակից առանց մեծ կորուստների, հանրության առումով առանց տուժելու կարողանանք դուրս գալ, մեր պայմանավորվածությունները գոնե երեկ էդպիսին են, ոչ մի նախապայման, ցանկացած հարց պատրաստ ենք քննարկել: Որեւէ նախնական պահանջով մենք չենք մոտենում քաղաքական կոնսուլտացիաներին»,- ասել է նա:
Նրա կարծիքով բանակցությունները կարող են սկսվել հանրապետության նախագահի նախաձեռնությամբ. «Կարծում եմ նախագահն արդեն դիմում է առանձին քաղաքական ուժերի` հրավիրելով քաղաքական կոնսուլտացիաների: Սա լուրջ քաղաքական ռեսուրս է, որը պետք չէ անտեսվի»:
Խոսրով Հարությունյանը ասաց, որ Սերժ Սարգսյանը նախօրեին ՀՀԿ խմբակցության հետ հանդիպման ժամանակ ասել է, որ ինքը հասկացել է, որ հանրության մի ստվար զանգված դեմ է իր վարչապետի պաշտոնում աշխատանքին, այդ իսկ պատճառով հետագա բացասական զարգացումներից խուսափելու համար նա հրաժարական է տվել:
«Ես ինքս այդ քայլը գնահատում եմ որպես շատ պատասխանատու պետական այրի, քաղաքական գործչի քայլ».-ասաց նա:
Խոսրով հարությունյանը կարծում է, որ Սերժ Սարգսյանի ՀՀԿ-ն ղեկավարելուց հրաժարվելը վարչապետի պաշտոնից հրաժարվելու տրամաբանական շարունակությունն է: