Կառավարությունն իր այսօրվա՝ ապրիլի 26-ի նիստում հաստատել է 2017 թվականի բյուջեի կատարողականը: Այս մասին, այսօր կառավարությանի նիստից հետո կայացած ճեպազրույցում նշել է ՀՀ ֆինանսների նախարարի պաշտոնակատար Վարդան Արամյանը:
«Մենք ունենք ձեւավորված մշակույթ եւ օրենքն է պահանջում, որ մինչեւ մայիսի 1-ը նախորդ տարվա պետական բյուջեի կատարման վերաբերյալ կառավարությունը հաստատում է հաշվետվությունը եւ ներկայացնում է ԱԺ քննարկմանը: Կառավարությունում այսօր հաստատեցինք հաշվետվությունը եւ այն մայիսի 1-ին կգտնվի ԱԺ-ում: Մենք ինչպես նախորդ տարի, կկազմակերպենք պրեզենտացիա, մանրամասն կներկայացնենք, թե ինչպիսին է 2017-ի կատարողականը»,-ասաց նա:
Նրա խոսքով, դեռեւս 2016 թվականին 2017-ի բյուջեն ներկայացնելիս իրենք խոստանում էին այնպիսի հարկաբյուջետային քաղաքականություն վարել, որը կկայունացնի մակրոտնտեսական իրավիճակը եւ այդ խոստումը կատարվել է: «Հիշում եք, որ 2016-ին պարտք/ՀՆԱ ցուցանիշը զգալի աճ էր արձանագրել՝ շուրջ 7,7 տոկոս, իսկ արդեն 2017-ին պարտք/ՀՆԱ աճի տեմպերն էապես դանդաղել են. 7,7, տոկոսի փոխարեն ունեցել ենք 1,8 տոկոսի աճ»:
Վարդան Արամյանը նշեց, որ եթե 2018 թվականին ամեն ինչն ընթանա իր հունով, կառավարությունը կկարողանա խոցել այն թիրախները, որը դրվել է 2018 թվականի բյուջեի հիմքում. «Կունենանք պարտք-ՀՆԱ ցուցանիշի նվազում` առնազն մեկ տոկոսի տեսքով»: