Նաիրիտը չպետք է դառնա քաղաքական շահարկման առարկա. մարդը պետք է վստահ լինի, որ ներդրում անելուց հետո չեն նեղելու, ոչ մի ակցիա չեն անելու։ Այս մասին ապրիլի 27–ին «Նարիրիտ» գործարանի նախկին աշխատակիցների եւ համակարգող խմբի հետ հանդիպմանը նշել է «Նաիրիտ գործարան» ՓԲԸ-ի սնանկության գործով կառավարիչ Կարեն Ասատրյանը։
Նաիրիտցիներն այսօր բողոքի ակցիա են իրականացրել եւ պահանջել դադարեցնել գործարանի գույքի օտարումը:
Նախկին աշխատակիցները կարծում են, որ գործարանը հնարավոր է վերագործարկել եւ ստանալ շահույթ: Նրանք բարձրացնում են գործարանի վերագործարկման անհրաժեշտության հարցը՝ դժգոհելով, որ ՀՀ կառավարությունից չեն արձագանքում իրենց նամակներին, չեն հանդիպում իրենց հետ եւ լսում իրենց հուզող հարցերը:
«Նաիրիտ» գործարանի նախկին տնօրեն Կարեն Իսրայելյանը նշել է, որ կան ներդրողներ, չնայած կատարվում է գործարանի մասնակի օտարում. «Չնայած մասնակի օտարմանը, հիմնական արտադրությունը պահպանվել է։ Պարսկական ընկերություն կա, ինչպես նաեւ ամերիկյան ինժեներների եւ գիտնականների ասոցացիա։ Ասոցացիայի մասանգետների խումբ է պատրաստվում գալ Հայաստան։ Բուլղուրական ընկերությունն է եղել գործարանում մինչեւ դրա սննկացումը»։
Կարեն Ասատրյանը շեշտել է, որ արտադրությունը կատարվում ցիկլերով եւ ինքը դիտարկում է, թե որ փուլը կարող է ավտոմատ լինել։ «Համալիր արտադրության համար ներդնող գտնելը դժվար է, առանձին արտադրության համար ավելի հեշտ է»,–հավելել է նա։
Իսկ գործարանի գույքի օտարման մասով նաիրիտցիների մտահոգությանն ի պատասխան՝ սնանկության գործով կառավարիչը խորհուրդ է տվել դիմել պարտատերի խորհրդին դրա կազմում ներառվելու եւ համապատասխան իրատեսական ծրագիր ներկայացնելու համար. «Ցանկացած գույք, որ ներկայացվում է օտարման, պարտատերերի խորհուրդը տալիս է իր եզարակացությունը։ Եթե մտածում եք, որ այս կամ այն մասը չպիտի օտարվի, պետք է դիմեք պարտատերերի խորհրդին եւ դատարանին, որ կասեցվի գործընթացը։ Իսկ որպեսզի խորհրդի նիստերին մասանկցություն ունենաք, դիմեք դատարանին»,–ընդգծել է Կարեն Ասատրյանը։