Անդընդհատ կարդում ենք, որ ինչ-որ խմբեր, ինչ-որ պաշտոնյաներ, այդ թվում ՀՀ նախագահի պաշտոնը զբաղեցնող Արմեն Սարգսյանը քննարկում են վարչապետի թեկնածուի հարցը. դուրս եկեք փողոց ու տեսեք, որ այդ հարցը փակված է: Այս մասին, այսօր՝ ապրիլի 28-ին, Վանաձորի Հայքի հրապարակում «Իմ քայլը» շարժման հանրահավաքում հայտարարեց «Քաղաքացիական պայմանագիր» կուսակցության անդամ, Երեւանի ավագանու «Ելք» խմբակցության անդամ Արայիկ Հարությունյանը:
Նա կոչ արեց քաղաքական ուժերին ու գործիչներին՝ այս հարցը քննարկելիս հաշվի առնել այն իրողությունը, որ այսօր կա Հայաստանում:
«Այս հրապարակն արդեն ունի իր թեկնածուն եւ բոլոր այն գործիչները, որոնք կհանդգնեն առաջադրվել այդ պաշտոնում, պետք է հիշեն, որ ապագայում չեն կարողանալու քաղաքական գործունեությամբ զբաղվել, որովհետեւ հանրությունը դա ընկալելու է որպես իր հաղթանակի գողություն:
Քաղաքական ուժերը կոնսենսուսով, ԱԺ բոլոր խմբակցությունները պետք է հավաքվեն եւ վարչապետի թեկնածու առաջադրեն հրապարակի կողմից առաջադրված Նիկոլ Փաշինյանին»,-հայտարարեց Արայիկ Հարությունյանը:
Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:
Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել:
Փաշինյանն իր հերթին հայտարարել է, որ վերսկսում են բողոքի գործողությունները, քանի որ ՀՀԿ-ն Սերժ Սարգսյանի հրաժարականի գնով ուզում է պահպանել իշխանությունը: