Վանաձորում հանրահավաքն ու երթն ավարտվել են. շարժման առաջնորդ Նիկոլ Փաշինյանն իր կողմնակիցների հետ այս պահին վերադառնում է Երեւան: Թեեւ արդեն մութ է, սակայն գրեթե բոլոր բնակավայրերում, մասնավորապես, Սպիտակ-Ապարան ճանապարհահատվածում, մարդիկ դուրս են եկել ավտոմայրուղի եւ դհոլ-զուռնայով կանգնեցնում են Փաշինյանի գլխավորած ավտոշարասյունը:
Լուրը, որ Գագիկ Ծառուկյանն իր թիմով սատարում է ժողովրդի թեկնածուին, Փաշինյանն ու ավտոերթի մասնակիցներին հասավ Սպիտակ քաղաքում, որտեղ հրավառություն տեղի ունեցավ:
Այս պահին ավտոերթը մտնում է Ապարանին, որտեղ եւս մեծ հրավառություն է:
Հիշեցնենք, որ վարչապետի ընտրության հարցը ԱԺ-ն քննարկելու է մայիսի 1-ի հատուկ նիստում: ՀՀԿ խմբակցությունն արդեն հայտարարել է, որ վարչապետի թեկնածու չի առաջադրելու: «Ելք»-ը հայտարարել է, որ մտադիր է առաջադրել Նիկոլ Փաշինյանի թեկնածությունը: ՀՅԴ-ն առաջարկել է բոլոր խմբակցություններին վարչապետի միասնական թեկնածու առաջադրել, իսկ «Ծառուկյան» դաշինքը որոշել է սատարել «ժողովրդի թեկնածուին»:
Նշենք, որ ԱԺ-ում ՀՀԿ-ն ունի 58 մանդատ, «Ծառուկյան» դաշինքը՝ 31, «Ելք»-ը՝ 9, ՀՅԴ-ն 7 մանդատ: Վարչապետի ընտրության համար անհրաժեշտ է 53 ձայն: