Ես տեսա, որ դիմակավորված անձը հանգիստ քայլում է: Այս մասին NEWS.am-ի թղթակից հետ զրույցում նշեց HSBC բանկի մասնաճյուղի վրա հարձակման ականատեսներից մեկը, որը հարեւանությամբ գործող սննդի կետի աշխատակից է:

Նա նշեց, որ զուտ կրակոցն են լսել. «Հետո էլ տեսանք, որ դիմակավորված անձը հանգիստ քայլում էր, ոստիկանը նրա հետեւից գնաց ու այդ ընթացքում կրակոց լսեցի, այսինքն՝ նրան էլ կրակեցին։ Կարծում եմ մինչ այդ թալանն արդեն տեղի էր ունեցել»,–ասաց նա:

Նշենք, որ մայիսի 3-ին, ժամը 14.25-ի սահմաններում ոստիկանություն ահազանգ է ստացվել, որ HSBC բանկի` Կոմիտասի պողոտա-Գյուլբենկյան փողոց խաչմերուկում գտնվող մասնաճյուղի վրա ավազակային հարձակում է կատարվել: հարձակման հետեւանքով կա 1 զոհ, 2 վիրավոր:

Պարզվել է, որ ավազակային հարձակում կատարած անձը, դանակով, նռնակով, հրացանով զինված, ներխուժել է բանկ, վիրավորել երկու աշխատակցի, որոնցից մեկը մահացել է: Ավազակային հարձակում կատարած անձը հափշտակել է գումար ու դիմել փախուստի, սակայն հեռու փախչել չի հաջողվել:

Անհապաղ դեպքի վայր ժամանած օպերատիվ խմբի կողմից շրջափակվելով` նա դիմադրություն է ցույց տվել, վիրավորել ոստիկաններից մեկին, սակայն իրավապահներին հաջողվել է արագորեն վնասազերծել ու տեղափոխել ոստիկանություն:

Պարզվել է, որ հանցագործություն կատարած անձը Ճանապարհային ոստիկանության տեսանկարահանման միջոցով հայտնաբերված խախտումների արձանագրման կենտրոնի պետ, ոստիկանության գնդապետ Դանիել Դանիելյանն է: