Ռուսական Գլխավոր հետախուզական վարչության նախկին աշխատակից Սերգեյ Սկրիպալը շարունակում է բժիշկների հսկողության ներքո գտնվել, հայտնում է ՏԱՍՍ–ը։
«Ես կարող եմ հաստատել, որ պացիենտը հիվանդանոցում է գտնվում, նրա մասին ամբողջ տեղեկությունը տեղադրված է Անգլիայի առողջապահության ազգային ծառայության կայքում։ Մյուս պացիենտը դուրս է գրվել»,–ասել է գործակալության զրուցակիցը։
Կոմյունիկեում նշված է, որ Սերգեյ Սկրիպալը եւ նրա դուստրը բացառապես դրական են արձագանքել բուժմանը. «Չնայած նա (Սերգեյ Սկրիպալը) դանդաղ է կազդուրվում, բայց հույս ունենք, որ նա եւս ժամանակի հետ դուրս կգրվի հիվանդանոցից»,–նշել է Սոլսբերի քաղաքային հիվանդանոցի բժիշկ Քրիստին Բլանշարդը։
Հիշեցնենք, որ 66-ամյա նախկին լրտես Սերգեյ Սկրիպալը եւ նրա դուստրը մարտի 4-ին նյարդապարալիտիկ գազի ազդեցության են ենթարկվել անգլիական Սոլսբերի քաղաքի առեւտրի կենտրոններից մեկում եւ անգիտակից վիճակում տեղափոխվել հիվանդանոց։
Մեծ Բրիտանիան հայտարարել է, որ հարձակման պատասխանատուն, անկասկած, Մոսկվան է: Մինչդեռ ՌԴ նախագահի մամուլի քարտուղար Դմիտրի Պեսկովը հայտարարել էր, որ Սոլսբերի քաղաքում ռուսական հետախուզական վարչության նախկին աշխատակից Սերգեյ Սկրիպալի եւ նրա դստեր թունավորմանը Ռուսաստանի ներգրավվածության առնչությամբ ադեկվատ եւ խելամիտ ապացույցներ Մոսկվային չեն ներկայացվել:
Հիշեցնենք, որ Մեծ Բրիտանիայի վարչապետ Թերեզա Մեյը հայտարարել էր 23 ռուս դիվանագետի արտաքսելու մասին՝ ռուս նախկին լրտեսի ու նրա դստեր թունավորման առնչությամբ: Մոսկվան հայելային պատասխան էր տվել։ Բրիտանիայի օրինակին էին հետեւել մի շարք երկրներ։
Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում: