Վերջին մի քանի շաբաթներին Հայաստանում ընթացող գործընթացներում լրատվամիջոցների դերը անհնար է թերագնահատել, քանի որ լրագրողների ինքնազոհ աշխատանքի շնորհիվ հաջողվեց հնարավոր արյունահեղությունից խուսափել: Մայիսի 10-ին լրագրողների հետ հանդիպման ժամանակ այսպիսի կարծիք հայտնեց ԱԺ նախկին պատգամավոր Հովհաննես Իգիթյանը:

Նրա խոսքով՝ հայ հանրությունն ու լրագրողները միլիմետր առ միլիմետր հասան այն մակարդակին, որ կարողացան հանգեցնել երկար սպասված փոփոխություններին: Նրա կարծիքով՝ իշխանությունը վախեցավ միջազգային հանրության խիստ արձագանքից եւ չհամարձակվեց ավելի արմատական մեթոդներով գործել: Իգիթյանը հավաստիացրեց, որ այս փոփոխությունների շնորհիվ Հայաստանի միջազգային հեղինակությունը զգալիորեն բարձրացել է: