Երուսաղեմում ԱՄՆ դեսպանատան բացումից մի քանի ժամ առաջ Իսրայելի եւ Գազայի հատվածի սահմանին բողոքի ցույցեր են սկսվել, որոնց հետեւանքով մայիսի 14-ին 7 պաղեստինցի է մահացել, առնվազն 500 մարդ վիրավորվել է, հայտնում է Պաղեստինի առողջապահության նախարարությունը, փոխանցում է DW- ն:
Ավելի քան 20 պաղեստինցի հրազենային վնասվածքներ է ստացել, երբ իսրայելցի զինվորները կրակ են բացել ցուցարարների վրա: Ականատեսների խոսքով՝ մի քանի պաղեստինցի փորձել է ճեղքել սահմանային ցանկապատերը եւ ներխուժել Իսրայել: Մի շարք ցուցարարներ ավտոմեքենաների անվադողեր են այրել, ինչի արդյունքում սահմանին ծխի խիտ եւ սեւ ամպ էր բարձրացել:
Պաղեստինցիները Գազայի հատվածում մայիսի 14-ին ընդհանուր գործադուլ են անցկացնում՝ բողոքելով Իսրայելում ԱՄՆ դեսպանատան՝ Թել-Ավիվից Երուսաղեմ տեղափոխման դեմ: Տարածաշրջանում չեն գործում խանութները, դպրոցները եւ համալսարանները: Ընդհանուր գործադուլին կոչ են անում մասնակցել Գազայի հատվածի բոլոր քաղաքական ուժերին, այդ թվում նաեւ՝ ՀԱՄԱՍ-ին: Մզկիթների վրա տեղադրված բարձրախոսներից բնակչությանն ուղղված կոչեր են հնչում մասնակցել բողոքի ցույցերին:
Սպասվում է, որ Գազայի հատվածի եւ Իսրայելի սահմանին հանրահավաքին մինչեւ մեկ միլիոն մարդ կհավաքվի:
