ԵԱՏՄ-ի առաջնահերթություններից Ռուսաստանն առանձնացնում է ապրանքների եւ ծառայությունների ընդհանուր շուկաների ստեղծման, արտադրության եւ տեխնոլոգիական համագործակցության ամրապնդմանն ուղղված ջանքերի ավելացումը: Այս մասին իր ելույթում նշել է Ռուսաստանի նախագահ Վլադիմիր Պուտինը, փոխանցում է Կրեմլի մամուլի ծառայությունը:
Պուտինն ընդգծել է, որ անհրաժեշտ է շարունակել ԵԱՏՄ անդամ երկրների փոխարժեքային ֆինանսական դրամավարկային քաղաքականության մոտեցմանն ուղղված ջանքերը, ինչպես նաեւ նոր եւ ավելի արդյունավետ տրանսպորտային եւ լոգիստիկ շղթաներ կառուցել:
«Այդ ոլորտներից շատերում արդեն իսկ լուրջ ձեռքբերումներ կան. աճում է ներքին առեւտուրը, մեծանում են երրորդ երկրներ ապրանքների եւ ծառայությունների մատակարարման ծավալները, բարելավվում է արտահանման համկարգը, ընդլայնվում է բարձր ավելացված արժեքով ապրանքների ծավալը, ստեղծվում են նոր համատեղ ձեռնարկություններ եւ խոստումնալից ներդրումային նախագծեր են գործարկվում: Արդյունքում, աճում է բոլոր անդամ երկրների համախառն ներքին արդյունքը»,- նշել է Վլադիմիր Պուտինը:
«Կարեւոր է շարունակել զարգացնել ինտեգրացիոն գործընթացները: Մեր կարծիքով՝ սերտ համագործակցության համար լավ հնարավորություններ կան այնպիսի ոլորտներում, ինչպիսիք են միջուկային եւ վերականգնվող էներգիան, բնապահպանությունը, բժշկությունը, տիեզերքը, զբոսաշրջությունը, սպորտը: Հատկապես օգտակար կլիներ ավելի մեծ ուշադրություն սեւեռել համագործակցությանը սոցիալական եւ հումանիտար ոլորտներին, կրթությանը, ինչպես նաեւ միջտարածաշրջանային եւ միջսահմանային կապերի խորացմանը»,- մասնավորապես նշել է ՌԴ նախագահը:
