ՄԱԿ-ի ստեղծման նպատակն էր, որպեսզի պատերազմը դադարի միջազգային քաղաքականության գործիք լինել, սակայն յոթ տասնամյակ անց այդ վտանգը դեռեւս չի վերացել: Գլոբալ զինաթափման ոլորտում նոր օրակարգը ներկայացնելիս այս մասին հայտարարել է ՄԱԿ-ի գլխավոր քարտուղար Անտոնիու Գուտերեշը:
Այն ուղղված է նաեւ միջուկային եւ զանգվածային ոչնչացման զենքի այլ տեսակների ոչնչացմանը: Գուտերեշը հայտարարել է, որ միջուկային զենքի տարածումն իրական սպառնալիք է մարդկության համար:
Նա հիշեցրել է, որ ներկայում աշխարհում 15 հազար միավոր միջուկային զենք կա, իսկ դրանց մեծ մասը կարող են գործարկվել հաշված րոպեների ընթացքում: «Մեկ մեխանիկական սխալը, էլեկետրական համակարգում խափանումը կամ մարդկային անփութությունը կարող են հանգեցնել աղետի, երբ աշխարհի երեսից ամբողջական քաղաքներ կանհետանան»,- ընդգծել է Անտոնիու Գուտերեշը:
Նրա խոսքով՝ միջուկային զենք ունեցող երկրները պատասխանատվություն են կրում այն բանի համար, որպեսզի դա տեղի չունենա: Այս համատեքստում նա Ռուսաստանին եւ ԱՄՆ-ին կոչ է արել հաղթահարել տարաձայնությունները՝ կապված Միջին եւ փոքր հեռահարության հրթիռների ոչնչացման մասին Համաձայնագրի հետ եւ երկարաձգել Ռազմավարական հարձակողական սպառազինության հետագա կրճատման մասին Համաձայնագրի գործողությունը, որն ավարտվում է երեք տարի անց: