Տարվա վերջին ունենալու ենք ոչ ավել, քան 4 տոկոս գնաճ: Այս մասին, այսօր՝ մայիսի 29-ին, ԱԺ հանձնաժողովների համատեղ նիստում 2017 թվականի պետական բյուջեի կատարողականի քննարկման ժամանակ նշեց ՀՀ կենտրոնական բանկի նախագահ Արթուր Ջավադյանը:
ՀՀԿ խմբակցության պատգամավոր Գագիկ Մինասյանը նշեց, որ անցած տարի ունեցել ենք բյուջեով նվազագույն սահմանում գնաճ՝ 2,6 տոկոս. «Առանձնապես մեծ գնաճային ճնշումներ հիմա չեն նկատվում: ԿԲ քաղաքականությունը ինչպիսի՞ն պետք է լինի, որ մեր գնաճը լինի կանխատեսվածից միջին շրջանակներում, ապահովվի տնտեսական աճի ավելի բարձր մակարդակ»,- ԿԲ նախագահին հարց ուղղել Մինասյանը:
Ի պատասխան Արթուր Ջավադյանն ասաց, որ այս պահին գնաճի ցուցանիշները հուսադրող են: «Այն իրավիճակը, որ մենք ունենք, մեր կողմից նախանշված գնաճը՝ 4 տոկոս, կդառնա իրականություն: Այստեղ բավական լուրջ ազդեցություն կունենա գյուղատնտեսական արտադրանքը, նաեւ մի շարք այլ գործոններ՝ միջազգային գների տենդենցները, տարածաշրջանային ռիսկերը եւ այլն:
Հուսադրող թվեր ունենք, գտնվելու ենք կանխատեսված հորիզոնում: Որոշակի ռիսկեր իհարկե կան եւ գների բարձրացման եւ նվազման ուղղությամբ: Մենք մտնում ենք սեզոնային դեֆլյացիոն շրջան, ունենալու ենք մրգերի գների նվազում, որի արդյունքում սեպտեմբերին հստակ կլինի, թե ինչ վիճակ կունենանք տարվա վերջին, բայց հիմա արդյունքները հուսադրող են եւ ունենալու ենք 4 տոկոս գնաճ: Ես վստահ եմ, որ դրանից պակաս ենք ունենալու»: