ԱՄՆ միգրացիոն եւ մաքսային ոստիկանության ներկայացուցիչները (ICE) հայտնել են, որ սկսել են օգտագործել դաշնային բանտերը՝ որպես անօրինական ներգաղթյալների պահման վայր: USA.one, www.usa.one-ի փոխանցմամբ՝ մոտ ապագայում այդ հաստատություններ 1600 մարդ կուղարկվի: Ինչպես հայտնել է ICE-ի մամուլի քարտուղար Դանի Բենեթը, սույն նպատակով ոստիկանությունը կհամագործակցի 5 դաշնային բանտի հետ: Դրանք գտնվում են Կալիֆորնիա, Արիզոնա, Օրեգոն եւ Տեխաս նահանգներում:

Յուրաքանչյուր դեպքում քրեակատարողական հիմնարկների ղեկավարությունը պետք է հնարավորինս կարճ ժամկետում տեղ ազատի որոշակի թվով մարդկանց համար: Օրինակ, Վիկտորվիլ քաղաքից (Կալիֆորնիա նահանգ) քիչ հեռու գտնվող բանտում միգրացիոն ոստիկանության կարիքների համար հազար տեղ կհատկացվի: Դա ստիպում է մոտ 500 բանտարկյալի վերաբաշխել մի քաի բլոկերով:

Քրեակատարողական համակարգի աշխատակիցների արհմիությունն արդեն հայտարարել է, որ նման գործողությունները նպաստում են անվտանգության թուլացմանը: Նրանց խոսքով՝ ICE-ի ներկայացուցիչները անընդհատ շտապեցնում են բանտերի ղեկավարությանը տեղ ազատելու հարցով, ինչը մի շարք խնդիրներ է առաջացնում: