Ռուսաստանի օրվա տոնի ժողովրդական բնույթի մասին վկայում է այն, որ ռուսներն այն տոնում են ոչ միայն իրենց հայրենիքում, այլեւ նրա սահմաններից դուրս` ընկերների շրջապատում: Այս մասին հայտարարել է ՀՀ արտգործնախարար Զոհրաբ Մնացականյանը՝ ելույթ ունենալով Ռուսաստանի Դաշնության դեսպանատանը Ռուսաստանի օրվան նվիրված ընդունելության կապակցությամբ:
Տեսնելով դահլիճում հավաքված հյուրերին, Հայաստանի արտգործնախարարը նշել է, որ Ռուսաստանի բարեկամների թիվը բավականին մեծ է:
«Ի սրտե շնորհավորում եմ բոլոր ռուսներին Ռուսաստանի օրվա կապակցությամբ: Այս օրը ռուսները պատվում են իրենց հայրենիքը` հազարամյա պատմություն եւ յուրահատուկ ժառանգություն ունեցող երկրին, որն ահռելի տարածությունում միավորել է բազմաթիվ ժողովուրդներ, մշակույթներ եւ ճակատագրեր», - ասել է Մնացականյանը:
Նա ընդգծել է, որ հայ եւ ռուս ժողովուրդներին միմյանց կապում են բազմաթիվ խորքային թելերն ու ամուր հիմքը, որի վրա կառուցվում են Հայաստանի եւ Ռուսաստանի բազմակողմանի միջպետական հարաբերությունները եւ որոնք վստահորեն զարգանում են դաշնակցային փոխգործակցության մեջ:
Միեւնույն ժամանակ Մնացականյանը բարձր է գնահատել ղարաբաղյան հակամարտության բացառապես խաղաղ կարգավորման գործում Ռուսաստանի միջնորդական ջանքերը որպես ԵԱՀԿ Մինսկի խմբի համանախագահի: