Երիտասարդ կլարնետահար Էրիկ Աբրամովիցը իր նախկին ընկերուհուց դատարանով 350 հազար կանադական դոլար կստանա, որը գիտակցաբար փչացրել է իր երաժշտական կարիերայի հեռանկարները՝ նրա փոխարեն ներկայանալով, փոխանցում է BBC-ն:
2014 թվականին Ջենիֆեր Լին Էրիկից գաղտնի նրա անունից մի քանի էլեկտրոնային նամակներ է ուղարկել, որոնցում նշել է, որ հրաժարվում է իրեն շնորհված հեղինակավոր կրթաթոշակից:
Աղջիկն այս կերպ ցանկացել է կանխել իրենց բաժանումը: Ավելի ուշ նրա գործողությունների մասին տեղեկանալով՝ Էրիկը նրան դատի է տվել:
Դատավորը որոշել է, որ նրա գործողությունները «վրդովեցուցիչ միջամտություն են Աբրամովիցի մասնագիտական գործունեությանը»:
Կրթաթոշակը, որը Լոս Անջելեսի Կոլբուրն կոնսերվատորիայից առաջարկել էին, կազմում էր տարեկան մոտ 50 հազար դոլար:
Էրիկը լիովին վստահել է ընկերուհուն, եւ նա լափթոփում նրա փոստին հասանելիություն է ունեցել: Լոս Անջելեսից էլեկտրոնային նամակ հայտնաբերելով՝ Ջենիֆերը պատասխանել է Էրիկի անունից՝ պարզաբանելով, որ չի կարող առաջարկն ընդունել, քանի որ «այլ վայրում է լինելու»: Որից հետո նա այս նամակագրությունն ուղղակի ջնջել է:
Դատարանում Էրիկը հայտարարել է, որ Ջենիֆերը հասկանում էր, որ ինքը, հնարավոր է, այդ առաջարկն ընդունի, քանի որ տեղյակ էր, որ նման ուսումնառությունն իր համար մատչելի չէր:
«Ես պարզապես կարկամեցի, երբ կարդացի այդ նամակը: Ես ստիպված էի այն մի քանի անգամ կարդալ»,- ասել է Էրիկ Աբրամովիցը BuzzFeed-ի լրագրողներին: - Ինձ համար դժվար էր անհաջողության հետ հաշտվել: Ես շատ օրեր այդ մասին մտածում էի տխրությամբ եւ զայրույթով»:
