Փետրվարի 23-ին Հրազդան գետից մահացած դուրս բերված 26-ամյա Վարդան Մնացականյանի դիակի դատաբժշկական փորձաքննության արդյունքները ստացվել են, սակայն դեռ չի պարզվել, թե ինչ հանգամանքներում է վրա հասել երիտասարդի մահը: Այս մասին NEWS.am-ի հետ զրույցում ասաց մահացածի քույրը` Մերի Մնացականյանը:
«Փորձաքննության արդյունքներով պարզվել է, որ Վարդանի մահը վրա է հասել դին հայտնաբերելուց 48 ժամ առաջ, նրա մարմնի վրա հայտնաբերվել են բազմաթիվ վնասվածքներ, որոնք չեն պարզվել, թե ինչ հանգամանքներում են հասցվել: Եւ չի պարզվել, թե ինչ հանգամանքներում է մահացել եղբայրս, այսինքն` սպանություն է եղել, թե ինքնասպանություն»,-ասաց Մերին:
Նա հավելեց, որ քրեական գործի շրջանակներում ոչ մեկին մեղադրանք չի առաջադրվել եւ իրենք էլ չգիտեն, թե ով կարող էր Վարդանին սպանել:
Նշենք, որ Վարդան Մնացականյանի ընտանիքը չի հավատում ինքնասպանության վարկածին եւ պնդում է, որ նրան սպանել են:
Ավելի վաղ հաղորդել էինք, որ փետրվարի 23-ին Հրազդան գետից մահացած դուրս է բերվել 26-ամյա Վարդան Մնացականյանը, ով ոստիկանության Էրեբունու բաժնի կողմից հունվարի 30-ից որոնվում էր որպես անհետ կորած:
Նշենք, որ Վարդան Մնացականյանը աշխատում էր «Ռոսիա» առեւտրի կենտրոնում՝ որպես անվտանգության աշխատակից։