Հայաստանը միջազգային գործընկերներին տեղեկացնում է Նախիջեւանի ուղղությամբ Ադրբեջանի գործողությունների մասին: Այս մասին հունիսի 18-ին կայացած ճեպազրույցի ժամանակ ասաց ԱԳՆ մամուլի քարտուղար Տիգրան Բալայանը:
Նրա խոսքով՝ հայկական կողմն այս ուղղությամբ աշխատանք է իրականացնում դիվանագիտական ծառայության միջոցով, տեղեկացնում է կենդանի ուժի եւ տեխնիկայի կուտակումների մասին: «Ադրբեջանական լրատվամիջոցների տեղեկությունները «մարտերի» մասին սուտ են: Անհրաժեշտ է հիմնվել միայն մեր Պաշտպանության նախարարության պաշտոնական հաղորդագրությունների վրա»,- նշեց Բալայանը:
Միաժամանակ, նա շեշտեց, որ հայկական կողմի եւ ԵԱՀԿ ՄԽ համանախագահների համար առաջնահերթ է մնում Վիեննայի եւ Սանկտ Պետերբուրգի համաձայնությունների կատարումը: Պատասխանելով համանախագահների այցի ժամանակ ադրբեջանական կողմի սադրանքների մասին հարցին, որի հետեւանքով վերջերս զինվոր զոհվեց, Տիգրան Բալայանը շեշտեց, որ սա ԵԱՀԿ ՄԽ համանախագահների պարտականությունների եւ ինստիտուտի հանդեպ Ադրբեջանի արհամարհական վերաբերմունքի դրսեւորում է:
