Ազգային ժողովը վաղը՝ հունիսի 19-ին, արտահերթ նիստ կգումարի, որի օրակարգում Մանվել Գրիգորյանի նկատմամբ քրեական հետապնդում հարուցելու հարցն է: Նման որոշում է կայացրել կառավարությունն իր այսօրվա արտահերթ նիստում:
Հարցը կառավարությունում ներկայացրեց Արդարադատության նախարարի առաջին տեղակալ Արթուր Հովհաննիսյանը:
Նա, մասնավորապես, նշեց. «Սահմանադրության 96-րդ եւ քրեական դատավարության օրենսգրքի 129-րդ հոդվածների հիման վրա, Քրեական օրենսգրքի 235 հոդվածի 2-րդ մասով հանցանք կատարելու, այն է՝ մի խումբ անձանց կողմից զենք-զինամթերք պահելու կասկածանքով ձերբակալվել է ՀՀ ԱԺ պատգամավոր, ԵԿՄ նախագահ Մանվել Գրիգորյանը:
Նրա նկատմամբ քրեական հետախնդում կարող է հարուցվել միայն ԱԺ համաձայնությամբ, հետեւաբար Գլխավոր դատախազը դիմել է կառավարությանը՝ հայտնելով, որ առկա են ԱԺ պատգամավորի նկատմամբ քրեական հետապնդում հարուցելու, նրան նկտամամբ ազատությունից զրկելու հետ կապված խափանման միջոց կիրառելու բավարար հիմքեր եւ առաջ է եկել ԱԺ կանոնակարգ օրենքի 108-րդ հոդվածի առաջին մասով սահմանված կարգով պատգամավորի նկատմամբ քրեական հետապնդում հարուցելու եւ նրան ազատությունից զրկելու ԱԺ համաձայնությունն ստանալու նպատակով համապատասխան ընթացակարգ սկսելու անհրաժեշտություն:
ԱԺ կանոնակարգ օրենքի համաձայն, ԱԺ հերթական նիստերի ընթացքում պարտադիր քննարկման ենթակա հարցերից է պատգամավորի նկատմամբ քրեական հետապնդում հարուցելուն կամ նրան ազատությունից զրկելուն համաձայնություն տալու մասին հարցը:
Հաշվի առնելով այն հանգամանքը, որ ԱԺ հերթական նստաշրջանը ավարտվում է հունիսի 21-ին, իսկ այս նստաշրջանը, իսկ այս նստաշրջանի հերթական նիստերն արդեն իսկ ավարտվել են, ԱԺ հերթական նիստի օրակարգի հարցերը սպառելու նպատակով անհրաժեշտություն է առաջանում նախաձեռնելու արտահերթ նիստ, ինչն էլ առաջարկում է ի կատար ածել կառավարության որոշմամբ:
Առաջարկվում է արտահեթ նիստը հումարել հունիսի 19-ին, ժամը 11-ին, որի օրակարգում ներառվում է ԱԺ ՀՀԿ խմբակցության պատգամավոր Մանվել Գրիգորյանի նկատմամբ քրեական հետապնդում հարուցելուն կամ ազատությունից զրկելուն համաձայնություն տալու մասին Գլխավոր դատախազի միջնորդագրի քննարկման հարցը»:
Նշենք, որ ՀՀ գլխավոր դատախազ Արթուր Դավթյանը դիմել է ՀՀ վարչապետ Նիկոլ Փաշինյանին՝ ՀՀ ԱԺ պատգամավոր Մանվել Գրիգորյանի նկատմամբ քրեական հետապնդում հարուցելուն և նրան ազատությունից զրկելուն համաձայնություն տալու մասին ՀՀ գլխավոր դատախազի միջնորդությունը քննարկելու օրակարգով ՀՀ կառավարության նախաձեռնությամբ Ազգային ժողովի արտահերթ նիստ գումարելու համար:
Ավելի վաղ NEWS.am-ը հայտնել էր, որ ԱԱԾ-ն տեսանյութ է տարածել, որտեղ երեւում է, որ ԱԺ ՀՀԿ խմբակցության պատգամավոր Մանվել Գրիգորյանի հանգստի գոտու տարածքում հայտնաբերվել են սնունդ, դեղորայք, հիգիենիկ պարագաներ, որոնք ուղարկված են եղել դպրոցականների կողմից ապրիլյան պատերազմի մասնակիցներին:
Մասնավորապես, ԱԱԾ հաղորդագրության մեջ նշվում է, որ Մանվել Գրիգորյանին պատկանող հանգստյան գոտում հայտնաբերվել է «զինվորի բաժին» նշագրումով սնունդ, հիգիենիկ պարագաներ, դեղորայք, զինվորական հանդերձանք: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռեւս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր։
Հանրապետության տասնյակ մանկապարտեզներից, դպրոցներից, համայնքներից զինվորներին ուղարկված սնունդը՝ խտացրած կաթ, մակարոնեղեն, տոմատի մածուկ, պահածոյացված միս եւ բանջարեղեն, անգամ հիգիենայի պարագաներ, զուգարանի թուղթ, նույնպես պահեստավորված էին հանգստյան գոտու պահեստներում: Խուզարկությամբ հայտնաբերվեցին նաեւ պաշտպանության նախարարությանը մատակարարված «զինվորի համար» հատուկ գրությամբ մթերքներ, որոնք ենթակա չեն վաճառքի կամ այլ կարիքների համար օգտագործման:
Հիշեցնենք, որ Մանվել Գրիգորյանը ձերբակալվել է նրա ամառանոցում ապօրինի զենք, ռազմամթերք հայտնաբերելու փաստի առթիվ հարուցված քրեական գործի շրջանակներում: Քրեական գործը հարուցվել է ՀՀ Քրեական օրենսգրքի 235-րդ հոդվածի (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 2-րդ մասի հատկանիշներով։
Մանվել Գրիգորյանին պատկանող հանգստյան գոտում ԱԱԾ խուզարկության մանրամասները տեսանյութով