Ձեր գործընկերը անհարգալից վերաբերմունք է ցույց տալիս պատգամավորի նկատմամբ, օրինակ ինձ ասաց՝ դուք այդ տուշոնկայից օգտվե՞լ եք. Դա ասելու բա՞ն է: Այս մասին, այսօր՝ հունիսի 20-ին, ԱԺ-ում լրագրողների հետ զրույցում նշեց ԱԺ ՀՅԴ խմբակցության պատգամավոր Անդրանիկ Կարապետյանը՝ պատասխանելով հարցին, թե ինչո՞ւ է լրագրողներից մեկին անվանել «տուշոնկա»:
«Մենք քավոր-սանիկ ենք, բայց այդ հարաբերությունների մեջ երբեք չենք եղել: Ինձ ասում է՝ դուք ազգականներ եք, հետո ասում է՝ դուք օգտվել եք այդ տուշոնկայից։ Բա դա վիրավորակա՞ն չէ։ Լրագրողներն իրավունք ունեն պրոֆեսիոնալ հարցեր ուղղել եւ սպառիչ պատասխան ստանալ, բայց անձնական վիրավորանք հասցնել ոչ ոք թույլ չի տվել։ Ես դա վիրավորական եմ համարում։ Իրեն հարգող յուրաքանչյուր տղամարդ, կապ չունի՝ ԱԺ պատգամավոր է, թե ուղղակի քաղաքացի, պետք է դրանից վիրավորվի», - ասաց նա:
Անդրադառնալով Մանվել Գրիգորյանի անձին, Անդրանիկ Կարապետյանն ասաց. «Ազգի կեսը շաղկապված է եղել, նա Արցախի հերոս է եղել, բայց հերոս լինելով հանդերձ, երբ բանակի սնունդին են կպնում, եւ այդ հարցը ինձ են ուղղում, ես դա վիրավորական եմ համարում: Եթե կին լիներ հարցնողը, ուրիշ կերպ կպատասխանեի, բայց տղամարդու կողմից նման հարցը վիրավորական եմ ընդունել»,-ասաց պատգամավորը՝ հավելելով. «Ես որտեղի՞ց պետք է իմանայի, ես այդ ամառանոցում մեկ անգամ եմ եղել: Մենք մտերիմ չենք եղել, մեր հարաբերությունները սանիկ-քավոր չեն եղել: Եթե միայն զենքի մասին լիներ հարցը, ես ինձ ուրիշ կերպ կպահեի»:
Նշենք, որ լրագրողի հարցին, թե արդյոք ինքն օգտվել է Մանվել Գրիգորյանի պահուստից, մասնավորապես, տուշոնկաներից, Անդրանիկ Կարապետյանն արձագանքել էր՝ «այ տուշոնկա...»։