Երեւանի Մաշտոցի պողոտայում՝ Փակ շուկայի մոտ հունիսի 18-ին տեղի ունեցած վիճաբանության եւ կրակոցների վերաբերյալ ոստիկանությունը նոր մանրամասներ է հայտնում:
Հիշեցնենք, որ հունիսի 18-ին, ժամը 1.20-ի սահմաններում, ոստիկանություն են ահազանգել անհայտ անձինք եւ հայտնել, որ Երեւանի Մաշտոցի պողոտայում՝ Փակ շուկայի մոտ, վիճաբանություն է, կրակում են:
Նույն օրը, ժամը 1.45-ին, Մաշտոց-Խորենացի խաչմերուկի մոտից ոստիկանության Երեւան քաղաքի վարչության ՊՊԾ գնդի եւ Ճանապարհային ոստիկանության ծառայողները ոստիկանության Կենտրոնական բաժին են բերման ենթարկել 17-ամյա Արա Հ.-ին, 27-ամյա Ալբերտ Բ.-ին եւ ներկայացրել 35-ամյա Վազգեն Կ.-ին: Վերջինս հայտնել է, որ Արա Հ.-ն ու Ալբերտ Բ.-ն ծեծի են ենթարկել իրեն: Վազգեն Կ.-ն միաժամանակ ներկայացրել է գազային ատրճանակի փամփշտատուփ՝ լիցքավորված 3 փամփուշտներով, եւ հայտնել, որ դա իր ատրճանակի փամփշտատուփն է, իսկ ատրճանակը վիճաբանության ընթացքում կորցրել է:
Ոստիկանության Կենտրոնական բաժնից Վազգեն Կ.-ն բուժօգնության է տեղափոխվել բժշկական կենտրոն:
Ըստ նախնական տեղեկությունների՝ Մաշտոց-Խորենացի խաչմերուկի մոտ հիշյալ անձինք վիճաբանել են, խախտել հասարակական կարգը, բացահայտ անհարգալից վերաբերմունք դրսեւորելով հասարակության նկատմամբ՝ հայհոյել ու փոխադարձ հարվածներ են հասցրել միմյանց՝ խաթարելով երթեւեկության բնականոն ընթացքը:
Արա Հ.-ի անձնական խուզարկությամբ հայտնաբերվել է խոհանոցային դանակ:
Նշանակվել են փորձաքննություններ: Կատարվում է քննություն:
Ավելի ուշ ոստիկանության ծառայողների ձեռնարկած օպերատիվ-հետախուզական միջոցառումների շնորհիվ պարզվել է, որ վիճաբանությանը մասնակից է եղել նաեւ 23-ամյա Ռաֆայել Զ.-ն, որը բացատրական աշխատանքների շնորհիվ հունիսի 19-ին, ժամը 20.30-ին, ներկայացել է ոստիկանության Կենտրոնական բաժին եւ հայտնել, որ Վազգեն Կ.-ի մոտից ինքն է ատրճանակը խլել, կրակել օդ եւ դեն նետել:
Ձեռնարկվում են միջոցառումներ գազային ատրճանակը հայտնաբերելու ուղղությամբ:
Քննությունը շարունակվում է: