Այս պահին ունենք ցուցանիշների որոշակի նվազում արդյունաբերության մասով, որն ավելի շատ կապված է պաշարների առկայության եւ դրա իրացման խնդիրներով: Այս մասին, այսօր՝ հունիսի 21-ին, կառավարության շենքի դիմաց լրագրողների հետ զրույցում նշեց Տնտեսական զարգացման եւ ներդրումների նախարար Արծվիկ Մինասյանը:

Նրա խոսքով, հիմա իրենք ուսումնասիրում են խնդիրները. «Մենք ունենք նաեւ վարչապետի հանձնարարականը՝ ամեն ինչ անել, որ արտահանման ուղղությամբ հնարավոր խոչընդոտները վերանան: Մնացած ցուցանիշների մասով փորձում ենք նաեւ կապերը գտնել: Որտեղից է, որ ցուցանիշների նվազում ունենք: Սակայն պոտենցիալը լավատեսություն են ներշնչում»,-ասաց նախարարը:

Հարցին, թե արդյոք նման ցուցանիշներով հնարավոր կլինի տարեվերջին ապահովել նախատեսված 4,5 տոկոս աճը, Արծվիկ Մինասյանն արձագանքեց. «Մեր կանխատեսումներն այս պահին փոփոխված չեն դեպի վատը, հակառակը՝ մենք մտածում ենք, որ կունենանք ավելի լավ միջավայր, որը կնպաստի տնտեսական ցուցանիշների բարելավմանը»:

Հարցին, թե որքան կլինի տնտեսական աճը տարեվերջին, Արծվիկ Մինասյանն ասաց. «Թույլ տվեք չհրապարակել, որովհետեւ դրանք այնքան նուրբ հաշվարկներ են, որոնք ենթադրում են մի շարք պայմանների առկայություն»:

Նշենք, որ Ըստ Ազգային վիճակագրական ծառայության հրապարակման՝ 2018թ. հունվար-մայիս ամիսներին 2017թ. հունվար-մայիսի համեմատ Հայաստանում տնտեսական ակտիվության ցուցանիշն աճել է 8.6 տոկոսով: Այս տարվա մայիսին ապրիլի նկատմամբ աճը եղել է 10.4 տոկոս, իսկ 2018 թվականի մայիսին 2017- մայիսի համեմատ աճը եղել է 5.4 տոկոս: Այդուհանդերձ, արդյունաբերության ոլորտում գրանցվել է 3.1 տոկոսի անկում: