Ցանկացած ընտրություններից հետո միշտ Ընտրական օրենսգիրքը փոփոխման ենթակա է: Այս մասին, այսօր՝ հունիսի 21-ին, ԱԺ-ում լրագրողների հետ զրույցում նշել է ՀՀԿ խմբակցության ղեկավար Վահրամ Բաղդասարյանը:
«Այսինքն դասեր քաղելով գնում ենք նոր ընտրությունների եւ բնականաբար, քաղաքական զարգացումների արդյունքում պետք է նոր պահանջներ առաջանան եւ նոր փոփոխություններ: Առավել եւս հիմա քաղաքական փոփոխություններ են տեղի ունեցել եւ մենք պետք է անդրադարձ կատարենք: Ցանկացած առաջարկություն, որը կարվի, մեզ համար քննարկման առարկա է: Այն նույն խողովակով, որով նախորդ ընտրական օրենսգիրքն ենք քննարկել, նույն խողովակով նոր ընտրական օրենսգիրքը պետք է քննարկենք: Այսինքն այն ժամանակ մենք աշխատել ենք եւ Վենետիկի հանձնաժողովի, եւ ԵԱՀԿ/ԺՀՄԻԳ-ի հետ, հիմա էլ նույնկերպ պետք է արվի»,-հայտարարեց ՀՀԿ խմբակցության ղեկավարը:
Նրա խոսքով, հիմա քաղաքական ուժերի միջեւ պայմանավորվածություն պետք է ձեռք բերվի, որպեսզի ճանապարհային քարտեզը մշակվի հետագա քննարկումների: Վահրամ Բաղդասարյանը նշեց, որ երկրորդ նիստին իրենց քննարկումներին կմիանան նաեւ կառավարության ներկայացուցիչները՝ 3-ական հոգով. «Յուրաքանչյուր ուժ կներկայացնի իր առաջարկները, որից հետո քննարկումներ կսկսվեն արտախորհրդարանական ուժերի, ՀԿ-ների հետ, ՀՀ-ում ներկայացված միջազգային կազմակերպությունների, դեսպանությունների հետ, որից հետո կլինեն խորհրդարանական լսումներ: Կլինի քաղաքական կոնսենսուս, որից հետո կդիմենք ԵԱՀԿ/ԺՀՄԻԳ-ին եւ Վենետիկի հանձնաժողովին, որ նրանք իրենց ժամանակացույցը մեզ հատկացնեն, որ դա ունենա հնչեղություն: Մենք չենք կարող այն վարկանիշը, որ միջազգային հարթակներում ունեցել ենք, նահանջել»: