Արցախի Ազգային ժողովի «Վերածնունդ» խմբակցության ղեկավար Հայկ Խանումյանը պարզաբանում է ներկայացրել լիագումար նիստում իր եւ «Ժողովրդեավարություն» խմբակցության պատգամավոր Ժաննա Գալստյանի միջեւ տեղի ունեցած վեճի հետ կապված, որի ժամանակ, նրա փոխանցմամբ, սեռական բնույթի հայհոյանքներ են հնչել:
Խանումյանը Facebook-ի իր էջում տեսաուղերձում նշել է.
«Հունիսի 28-ին Արցախի Ազգային ժողովի հերթական լիագումար նիստում միջադեպ է տեղի ունեցել, այդ թվում՝ իմ մասնակցությամբ: Քննարկվում էր 2017թ.-ի բյուջեի կատարողականը: Ես ներկայացրել եմ «Վերածնունդ» խմբակցության տեսակետը: Ես դեմ եմ քվեարկել կատարողականին: Նորմալ է, որ բյուջեի կատարողականին դեմ քվեարկած ուժը խոսում է նախագահի հրաժարականի մասին, որովհետեւ նա այդ կառավարության ղեկավարն է, բյուջեի կատարողականի անմիջական պատասխանատուն:
Սա վրդովմունք է առաջացրել ԱԺ պատգամավոր Ժաննա Գալստյանի («Ժողովրդավարություն» խմբակցություն) մոտ, ով սեռական բնույթի բառերով սկսել է հայհոյել ինձ ու ստացել է նույնպիսի պատասխան»:
Նա նշել է, որ ներողություն է խնդրել ԱԺ դահլիճում գտնվողներից, բայց հավելել, որ Ժաննա Գալստյանի նման վերաբերմունքն առաջին անգամ չէ, դա նրա մոտ սովորություն է, իսկ ինքը պարզապես պատասխանել է պատգամավորին: