ԱՄՆ Միջազգային զարգացման գործակալության (USAID) կարգադրիչ Մարկ Գրինը հայտարարել է Արցախը ականներից որքան հնարավոր է արագ եւ մանրակրկիտ մաքրելու հանձնառության մասին:
Կոնգրեսական Բրեդ Շերմանի գրավոր հարցմանն ի պատասխան, Գրինը հիշեցրել է, որ HALO Trust-ի կողմից իրականացվող ականազերծման ծրագիրը Ղարաբաղում օգնել է ավելի քան 125 հազար մարդու:
Նա հիշեցրել է, որ ԱՄՆ-ն ականազերծման հարցով օգնություն է տրամադրում USAID-ի կողմից ֆինանսավորվող եւ HALO Trust-ի կողմից իրականացվող ծրագրի միջոցով: 2017 թվականի սեպտեմբերին տարածքի 97.6 տոկոսը մաքրվել է: Նրա խոսքով, իրենց վերջնական նպատակն այն է, որ Ղարաբաղը ամբողջությամբ մաքրվի ականներից:
«2017 թվականի հոկտեմբերին USAID-ն մոտավորապես 2.8 մլն դոլար է հատկացրել Լեռնային Ղարաբաղի ականազերծման համար, ինչը թույլ կտա երկարաձգել ականազերծման գործունեությունը մինչեւ 2019 թվականի սեպտեմբերը, երբ ընթացիկ ծրագրով ականազերծմանը USAID-ի աջակցությունը եւ HALO Trust- ի հետ համագործակցությունը կավարտվի: Մենք ինչպես եւ նախկինում կենտրոնանում ենք այն հարցի վրա, որ որքան հնարավոր է արագ եւ մանրակրկիտ ավարտենք ականազերծումը», - ասել է նա: