Պետք է արդարադատություն իրականացվի: Այս մասին այսօր` հուլիսի 1-ին լրագրողների հետ զրույցում ասաց վարչապետ Նիկոլ Փաշինյանը՝ մեկնաբանելով օրեր առաջ իր հանդիպումը ՊՊԾ գնդի գրավման ժամանակ զոհված ոստիկանների հարազատների հետ:
«Մտահոգություններ կային հարազատների մոտ, մասնավորապես, արդյոք արդադարադատություն կիրականացվի, թե կլինի քաղաքական դատավարություն եւ քաղաքական որոշումներ: Բնականաբար, մենք ասել ենք, որ պետք է իրականացվի արդարադատություն»,- ասաց վարչապետը:
Ավելի վաղ հայտնել էինք, որ վարչապետ Նիկոլ Փաշինյանն ընդունել է 2016 թվականին ՊՊԾ գնդի գրավման ժամանակ զոհված ոստիկանների ընտանիքների անդամներին եւ լսել նրանց բարձրացրած խնդիրներն ու մտահոգությունները:
Զոհվածների հարազատները դժգոհություններ ունեն մասնավորապես «Սասնա ծռերի» խափանման միջոցները փոխելու վերաբերյալ: Հիշեցնենք, որ դատարանները սկսել են փոխել Ծռերի խափանման միջոցներն ու նրանց ազատ են արձակում նիստերի դահլիճից: