Հուլիսի 23-ին Երկրագունդը կպատի 5-բալանոց սանդղակով առաջին մակարդակի G1 մագնիսական փոթորիկը, մագիսոլորտն ակտիվ կմնա հուլիսի 15-ին, 20-ին եւ 22-ին: Այս մասին վկայում են ՌԳԱ Լեբեդեւի անվան Արեւի ֆիզիկական ինստիտուտի ռենտգենյան աստղագիտության լաբորատորիայի կանխատեսումները, փոխանցում է «ՌԻԱ Նովոստի»-ն:
Մագնիսական փոթորիկները կարող են թույլ տատանումներ առաջացնել էներգետիկ համակարգերում, ինչպես նաեւ աննշան ազդեցություն ունենալ տիեզերական սարքերի կառավարման համակարգերի վրա:
Նախորդ փոթորիկները տեղի են ունեցել հունիսի 28-ին, մայիսի 6-ին եւ 7-ին, իսկ 2018-ի սկզբից ամենախոշորը՝ ապրիլի 20-ին: Մինչ այդ այս տարի նման առավելագույն ինտենսիվության հասել է միայն մեկ փոթորիկ, որը տեղի է ունեցել մարտի 18-ի լույս 19-ի գիշերը, սակայն առավելագույն փուլի տեւողությունը կազմել է ընդամենը մոտ 2,5 ժամ, նշել են աստղագետները:
Այսպիսի լայնության արեգակնային քամու հոսքերով Երկրի անցումը բացառիկ իրադարձություն չէ եւ հաճախ դիտվում է արեգակնային ակտիվության նվազագույնին մոտ: Սա կապված է այն բանի հետ, որ արեգակնային ցիկլի նվազագույնում էապես թուլանում է Արեգակի մագնիսական դաշտը, եւ այն իր ունակությունները մասամբ ծախսում է արեգակնային պլազման աստղի մակերեւույթին մոտ պահելու համար:
Արդյունքում՝ նկատելիորեն աճում է Արեգակից փախչող նյութի հոսքերի արագությունն ու խտությունը, որոնք էլ կազմում են արեւային քամին: