Լարսի անցակետում արդեն 8-րդ օրն է հազարավոր հայկական համարանիշներով բեռնատարներ են կուտակված, որոնց մի մասը բեռնված է գյուղմթերքով:
Բեռնատարների հայ վարորդները բողոքում են, որ տանջված ու անքուն գերի են ընկել. «Էստեղ գերի ենք ընկել, ոչ թողնում են գնանք առաջ, ոչ էլ՝ գնանք տուն: Մարդիկ գալիս առանց հերթի գնում են, հերթին չեն հետեւում: Սարի տակից հերթ ենք պահում, հասնում ենք էստեղ, դառնում է առանց հերթ, 200 մեքենայի տարբերությամբ գնում են: Մենք աշխատավոր մարդիկ ենք, թող կարգուկանոն հաստատեն, մեզ չտանջեն: Հերթում 4800 տեղում գտնվող մեքենան անցնում է, իսկ 4003 համարը դեռ էստեղ կանգնած է»,-բողոքում են վարորդները:
Նրանց պնդմամբ, հերթի երկարությունը հասնում է 8 կմ-ի. «2000 մեքենայից ավելի է, բոլորը հայկական մեքենաներ: Վրացական մեքենաները առանց հերթի գնում են: Կայանման համար էլ ամեն օր վճարում ենք»:
Հատկանշական է, որ հայ վարորդներին անցակետում ասել են, որ մեղավորը Հայաստանի կառավարությունն է, որ նման կարգ է սահմանել, սակայն իրենք չգիտեն, թե ինչ կարգի մասին է խոսքը:
Տրանսպորտի, կապի եւ տեղեկատվական տեխնոլոգիաների նախարարության մամուլի խոսնակ Անահիտ Առաքելյանը NEWS.am-ին հայտնել է, որ Լարսում հայկական բեռնատարների կուտակումը կապված է վրացական անցակետում ներդված նոր համակարգի հետ, որը ենթադրում է հերթի ամրագրում: «Նախարարության աշխատակիցները բանակցում են վրացի եւ ռուս գործընկերների հետ՝ Լարսի անցակետում հայկական բեռնատարների կուտակումների խնդրի հետ կապված»,- ասել է նա:
Իսկ ահա նույն Տրանսպորտի, կապի եւ տեղեկատվական տեխնոլոգիաների նախարարությունը հաղորդագրություն է տարածել, որ Լարսում կուտակումները պայմանավորված են զբոսաշրջային հոսքերի կտրուկ աճով, սահմանային անցակետի թողունակությամբ:
