Կան փաստեր, որ գոյություն չունեցող աշխատողներ են գրանցվում համայնքային ենթակայության տակ գտնվող հիմնարկներում։ Այս մասին այսօր՝ հուլիսի 5-ին Գորիսի քաղաքապետարանում Սյունիքի մարզի համայնքների ղեկավարների հետ հանդիպմանն ասաց վարչապետ Նիկոլ Փաշինյանը։
«Ես ուզում եմ կոչ անել բոլորին, եթե այդպիսի երեւույթներ կան, րոպե առաջ վերացվեն։ Բանը չհասնի նրան, որ իրավապահ մարմինները գան եւ պատժիչ գործողություններ իրականացնեն։ Ես չեմ կարծում, որ արդյունավետության բարձրացման խնդիրը մենք պետք է լուծենք իրավապահ մարմինների միջոցով»,–նշեց նա։
Վարչապետն ընդգծեց, որ նոր իրավիճակում յուրաքանչյուրի խնդիրը պետք է լինի այն, որ պետական միջոցները ծախսվեն մաքսիմալ արդյունավետ եւ նպատակային, ապա դիմեց համայնքների ղեկավարներին՝ ասելով. «Դուք բոլորդ կոռուպցիոն պարտավորություններից ազատված եք։ Մարդիկ պետք է զգան փոփոխությունները»։
Նա հավելեց, որ Հայաստանում օրինականության հաստատման գործընթացն անկասելի է. «Մեր նպատակը մարդկանց բանտերը լցնելը չի։ Սա ցածր նպատակ է։ Մեր նպատակը պետությանը հասցված վնասը վերականգնելն է»։