ԵՄ–ն շարունակում է Հայաստանում ֆինանսավորել այն «բացերը», որոնք ուրիշ ոչ ոք չի ցանկանում ֆինանսավորել։ Այս մասին այսօր՝ հուլիսի 16-ին մամուլի ասուլիսի ժամանակ ասաց Հայաստանում Եվրոպական միության պատվիրակության ղեկավար, դեսպան Պյոտր Սվիտալսկին՝ խոսելով ՀՀ–ում ԵՄ ծրագրերի ֆինանսավորման մասին:
Դեսպանը հիշեցրեց, որ «Աջակցության միասնական շրջանակ» (Single Support Framework) փաստաթղթով, որը նախապատրաստվել էր մինչեւ հեղափոխությունը ՀՀ–ում, մինչ 2020 թվականը ՀՀ–ին կտրամադրվի 170 միլիոն եվրո, որ 25 տոկոսով ավելին է: Ապա հավելեց, որ դրանով չի սահմանափակվում այն գումարը, որը Հայաստանը կարող է ստանալ եւ օգտագործել, կան նաեւ այլ ֆինանսական գործիքներ։
«Մենք խոսում ենք ԵՄ հարկատուների գումարների մասին։ ԵՄ–ն գումար չի «արտադրում», սա շատ կարեւոր է, քանի որ օրվա վերջում մենք նրանց պետք է բացատրենք, թե ինչու է ԵՄ–ի համար կարեւոր Հայաստանում ճանապարհների բարեկարգումը կամ, օրինակ, Նուբարաշենի բնակիչներին «ճահճից» ազատելը։ Հարկատուներից շատերը կարող են հարցնել՝ ինչո՞ւ պետք է գումար վճարեմ, որ ճանապարհները բարեկարգվեն Վրաստանում, Հայաստանում, որտեղ գուցե երբեք մեքենա չեմ վարելու։ Սակայն ԵՄ–ն շատ ժողովրդավար կազմակերպություն է։ Մի անհանգստացեք, մենք կարող ենք այս հարցը կարգավորել, ԵՄ–ում ապացուցել, որ գումարը ՀՀ–ում ճիշտ է ծախսվում»,–նկատեց նա։
Սվիտալսկին կարեւորեց հայաստանցիների գնահատականը։ «Օրինակ Ուրցաձորում, երբ ավարտեցինք մի փոքրիկ ծրագիր, ես տեսա մարդկանց երախտագիտությունը, որը մեր որպես «մոտիվացիա» է ծառայում։ ԵՄ–ն շարունակում է ֆինանսավորել այն «ճեղքերը», որոնք ուրիշ ոչ ոք չի ցանկանում անել»։