Հայաստանի կառավարությունն այսօր՝ հուլիսի 19-ի իր նիստում մեկ շաբաթով հետաձգեց Հայկական ատոմակայանի 2-րդ էներգաբլոկի պլանային նախապատրաստական վերանորոգման աշխատանքների շրջանակներում անմիջապես արտադրողից և մեկ անձից գնման ընթացակարգով գնման գործընթացներ կազմակերպելու մասին որոշման նախագիծը:
Նախագիծը ներկայացրեց Էներգետիկ ենթակառուցվածքների եւ բնական պաշարների նախարար Արթուր Գրիգորյանը:
Նա նշեց, որ ՀԱԷԿ-ում հունիսի 1-ից սկսվել է 2-րդ էներգաբլոկի պլանային նախապատրաստական վերանորոգման աշխատանքները, որի ավարտը նախատեսված է մինչեւ օգոստոսի 1-ը. «ՀԱԷԿ-ի վերագործարկման ժամկետի յուրաքանչյուր օր ուշացումը էներգահամակարգին կբերի շուրջ 220 մլն դրամի վնաս:
Պլանային նախապատրաստական վերանորոգման աշխատանքների ընթացքում ի հայտ են եկել չնախատեսված իրավիճակներ եւ տարբեր ապրանքների գնման նոր պահանջներ, որոնց ժամանակին գնումը դժվար էր կանխատեսել: «Գնումների մասին» ՀՀ օրենքով սահմանված համապատասխան գնման ընթացակարգի կիրառումը կհանգեցնի վերանորոգման նախնական պլանավորման ժամկետների խախտման՝ ՀԱԷԿ-ի գործարկման ժամկետների երկարացման»:
Հեւետեւաբար, առաջարկվում է, որ 2-րդ էներգաբլոկի պլանային նախապատրաստական վերանորոգման աշխատանքները սահմանված ժամկետում ավարտելու նպատակով թույլատրել մեկ անձից գնում իրականացնել:
ՀՀ վարչապետ Նիկոլ Փաշինյանը հարցրեց, արդյոք սա նշանակում է, որ այդ ապրանքներն արդեն գնված են, անգամ օգտագործվում են, ու կառավարությունը պարզապես որոշումն է կայացնում, ինչին նախարարը դրական պատասխան տվեց. «Այո, կան ապրանքներ, որոնցով արդեն պայմանագրերը կնքված են: Այդ ապրանքները չեն օգտագործվում, բայց բերված են, մենք ուրիշ տարբերակ չունեինք: Կան ապրանքներ, որ ձեռք են բերվում Ռուսաստանից, Բելգիայից, Չեխիայից: Որպեսզի չուշանանք, ստիպված ենք եղել օպերատիվ, արտակարգ ռեժիմով աշխատել, որ հետ չընկնենք գրաֆիկից»:
Փաշինյանն էլ նկատեց, թե հնարավոր չէ՞ր որոշումը շուտ կայացնել. «Հիմա, եթե արդեն գնվել է, կարո՞ղ ենք ավելի մանրամասն նայել այս ապրանքների ցանկը, նոր որոշում կայացնել: Անկախ նրանից, մենք այս որոշումը կկայացնենք, թե ոչ, օգոստոսի 1-ից ատոմակայանը կգործարկվի, ես առաջարկում եմ այս որոշումը նորից միասին նայենք, նոր որոշում կայացնենք: Կպարզվի, որ ամեն ինչ կարգին է, որոշումը կկայացնենք»:
Արթուր Գրիգորյանը հավաստիացրեց, որ իրենք նայել ենք գներն այլ արտադրողների մոտ, ամբողջությամբ եւ մեկ անձից գնումը պլանավորվել է ամենաորակյալ եւ ամենաէժան տարբերակով:
Այդուհանդերձ, որոշվեց խնդրին անդրադառնալ կառավարության հաջորդ նիստում:
