Ահազանգեր ունենք որ մոտենում են սպաների եւ զինծառայողների, որ գնան մասնակցեն հավաքների: Այս մասին այսօր՝ հուլիսի 24-ին, Ստեփանակերտում, լրագրողների հետ հանդիպման ժամանակ նշեց Արցախի պաշտպանության նախարար Լեւոն Մնացականյանը՝ անդրադառնալով Արցախում տիրող ներքաղաքական իրավիճակին:
«Այդ զինծառայողները մեզ զգուշացրել են եւ մենք բոլորին ասել ենք, որ օրենքով եւ Սահմանադրության համաձայն՝ իրենք չեն կարող քաղաքական կամ հասարակական կազմակերպությունների անդամներ լինել, մասնակցել հավաքների»,-ասաց նախարարը:
Հարցին՝ արդյոք ահազանգերը կապ ունե՞ն նախագահի հրաժարականը պահանջող ցույցերի հետ՝ նախարարը բացասական պատասխան տվեց:
Ավելի վաղ NEWS.am-ը հայտնել էր, որ ՀՀ վարչապետ Նիկոլ Փաշինյանի որոշմամբ գեներալ-մայոր Միքայել Արզումանյանն ազատվել է գլխավոր ռազմական տեսուչի տեղակալի պաշտոնից՝ իր դիմումի համաձայն։
Մինչ այդ, Փաշինյանը հուլիսի 7-ին շտապ իր մոտ էր կանչել ՀՀ ռազմական տեսուչի նորանշանակ տեղակալ, գեներալ Միքայել Արզումանյանին՝ բացատրություններ տալու համար՝ կապված նրա հետ, որ Արզումանյանը Արցախում քաղաքական գործընթացների մեջ է ներգրավված եղել:
Նշենք, որ դրանից օրեր առաջ «Արցախյան զարթոնք» նախաձեռնող խումբը հանդես էր եկել հայտարարությամբ այն մասին, որ Ստեփանակերտում հանրահավաք են հրավիրում՝ Արցախի նախագահ Բակո Սահակյանի հրաժարականի պահանջով:
Հայտարարության մեջ նշվում է, որ իրենց աջակցում է նաեւ գեներալ Միքայել Արզումանյանը։ Նախաձեռնող խումբը նաեւ գեներալի հետ արված լուսանկար է տեղադրել իր ֆեյսբուքյան էջում:
