Ռուսաստանի արտաքին գործերի նախարար Սերգեյ Լավրովի հայտարարության առնչությամբ Արարատ Միրզոյանի դիրքորոշումը տառացիորեն համընկնում է ՀՀ ԱԳՆ հայտարարությանը, նա ոչինչ չունի դրան ավելացնելու։ Այս մասին առաջին փոխվարչապետը հայտարարեց օգոստոսի 2-ին՝ լրագրողների հետ զրույցում։
Անդրադառնալով ՀՀԿ–ականների այն գնահատականին, որ այդ հայտարարությունը ահազանգ է եւ վտանգավոր զարգացումներ է կանխատեսում, Արարատ Միրզոյանը նկատեց. «Հանրապետականների իրավիճակի գնահատականը տարբերվում է իրավիճակի օբյեկտիվ գնահատականից, դա ապացուցված է»։
Ավելի վաղ Լավրովը հայտարարել էր, որ Հայաստանում տեղի ունեցող իրադարձությունները հակասում են երկրի նոր ղեկավարների հայտարարություններին այն մասին, որ հրաժարվելու են իրենց նախորդների նկատմամբ քաղաքական հետապնդումներից։
Լավրովի հայտարարությունը մեկնաբանել էր ՀՀ ԱԳՆ մամուլի խոսնակ Տիգրան Բալայանը. «Մենք հետեւում ենք միջազգային արձագանքներին Հայաստանում տեղի ունեցող ներքին գործընթացների շուրջ, որոնք պայմանավորված են կառավարության ներքին առաջնահերթություններ հանդիսացող իրավական պետության եւ արդարադատության անկախ համակարգի կայացմամբ, կոռուպցիայի դեմ պայքարով։
Այս գործընթացները փոխկապակցված չեն Հայաստանի արտաքին քաղաքականության հետ եւ չպետք է տարընթերցման առիթ հանդիսանան։
Այս առնչությամբ վերահաստատում ենք, որ մեր արտաքին քաղաքական առաջնահերթությունները, որոնք հստակորեն ամրագրված են խորհրդարանի կողմից հաստատված կառավարության ծրագրում, ուղղված են հայ-ռուսաստանյան դաշնակցային հարաբերությունների հետագա ամրապնդմանն ու խորացմանը, ՀԱՊԿ եւ ԵՏՄ շրջանակներում փոխգործակցության արդյունավետության բարձրացմանը։
Մենք անշեղորեն հետեւում ենք հռչակված ուղեգծին»։